1828-н оны зун цагт тавдугаар ноён хутагт Данзанравжаа бээр Альшаагийн нутагт “Чөмөг жарз” хийж ахуйд нэгэн өдөр элгэн тал нь зулгарч урагдсан, их л холоос яваа бололтой бүдүүн эрээн могой иржээ.
Түүнийг харсан хутагт шавь, бараа болооч нартаа Галбын уулсын эзэн надтай уулзахаар ирж хэмээн айлдаж, ойролцоох булагт могойг амрааж бай гэж хэлжээ.
Түүнээс долоо хоног болсны хойно мөнөөхөн могойг таган дээрээ агаар орохуйц нүхтэй том модон хувинд хийж, Уран хэмээх Чоймбол хэмээх шавиа дуудан энэ могойг авч баруун хойш чиглэж яваад Галбын уулс гэж мөн эсэхийг асууж яваад уулыг нь олмогцоо тэнд нь тавиад ойр орчмын сонин содон тогтоцтой уул хадны зургийг зураад ир гэж хэлээд явуулж.
Тэд сураглан явсаар Галбын уул буюу өнөөгийн Ханбогд хайрхныг олж ирээд өнөөх могойг савнаас нь гарган тавьж, хутагтын зарлиг ёсоор ойр хавийн сонин содон тогтоцтой уул хадны зургийг зурж очжээ. Тэднийг ирэхэд нь авч ирсэн зургийг нь үзсэн ноён хутагт Данзанравжаа “Миний Галба нутагт очих цаг болсон байна” гээд төд удалгүй морилсон гэдэг.
Галбын уулс, Галбын шаргал говьд ирж өнөөгийн Дэмчигийн хийдийн гороонд орших “Хутагтын завилгаа” хэмээх өндөр байц хадан дээр шөнөд нь Гомбо буюу Махагала бурхныг тахиж, бясалгасаар долоо хоносон бөгөөд нэгэн өглөө бараа болоочид, шавь нараа дуудан морь авч ирүүлж, ойр хавийн газар нутгаар сар гаруй явж, газар нутгийг нь нарийвчлан шинжиж, энэ нутагт би хийд орон байгуулж, бурхны ном, сургаалиа дэлгэрүүлэх учиртай юм хэмээн айлджээ.
Чухам үүнээс хойш амьдралынхаа 20 шахуу жилийг өнгөрөөж, энэ нутагт Галбын гурван (Дэмчиг, Ритод-уулын дотор буюу Улаан сахиусны, Цагаан толгойн хийд)-ийг Хятадаас хэсэг барилгачин Хятадуудыг авч ирэн бариулж байгуулжээ.
Галбын гурван хийдийг барьж байгуулах үед олон сая жил болсон асар том боржин чулуунаас Галба нутгийн өвс ургамлаар найруулсан, чулууны хороор Хятад барилгачдын эгээ л зуурсан гурилыг хутгаар зүсэхэд цэвэрхэн, тэгш зүсэгддэг шиг зүсэн авсан чулууны үйлдвэр хэмээх газар хийдийн зүүн өмнөхөн бий.
Галбын гурван хийдэд хийж залсан чулуун арслан, сүм дуганы модон баганын чулуун суурь, сүм дуганы суурь, доод хүрээгээр хэрэглэсэн олон тооны боржин чулууг мөн эндээс бэлтгэжээ.
Тэдний олон сая жилийн өмнө үүссэн боржин чулуунаас зүсэн авсан хэсэг нь хэдий хоёр зуу гаруй жилийн өмнө авсан ч өчигдөрхөн зүсэн авсан мэт ялгарч харагдана.
Хүмүүсийн Дэмчигийн хийдийн нийтлэг мэддэг “Бэлэг хад” хэмээх байгалийн сонин тогтоцтой хад нь зүүн өмнөөсөө ингэж харагдах хэдий ч баруун урд талаасаа зулзагаа дагуулсан эм арслан шиг харагддаг.
Хэдий эртний явдал мэт санагдавч ноён хутагт Данзанравжаагийн амьдарч, ном бүтээлээ туурвин байсан үе сая сая жилийн он цагийн хажууд өчигдөрхөн мэт шинээрээ байх ажээ.
