Төр, нийгмийн нэрт зүтгэлтэн С.Зоригийн амь насыг хороосон хэрэгт буруутгагдан хорих ял эдлэж буй Б.Содномдаржаа, Т.Чимгээ нарыг байцаах явцдаа эрүүдэн шүүсэн хэмээн тэдний өмгөөлөгч нараас өнөөдөр мэдээлэл хийлээ.
Эрүүдэн шүүсэн гэх хэрэгт холбогдуулан ТЕГ-ын дарга асан Б.Хурц, Улсын Ерөнхий Прокурорын орлогч асан Г.Эрдэнэбат нарын есөн хүнийг шүүгдэгчээр татсан билээ.
Өмгөөлөгч Б.Мэргэн
“Хэргийн хувьд Анхан шатны шүүхээс хэргийг нэмэлт мөрдөн байцаалтад буцаасан ч прокурор эсэргүүцэл бичиж, давж заалдах шатны шүүх эсэргүүцлийг нь хүлээн авсан. Ингээд хэргийг байгаа материалынхаа хүрээнд шийдвэрлэ хэмээн анхан шатны шүүх рүү буцаасан. Өмгөөлөгчдийн хувьд энэ шийдвэртэй санал нийлэхгүй байгаа учраас магадлалаа гардаж авсны дараа Улсын дээд шүүхэд гомдол гаргах байр суурьтай байна.
Бид ярилцаад Монгол Улсын Ерөнхийлөгч, ҮАБЗ-ийн тэргүүн Х.Баттулгад хандаж төрийн нууцад хамааруулсан хэргүүдийг ил болгох талаар хүсэлт гаргаж байгаа. Ерөнхийлөгчөөс ҮАБЗ-өө хуралдуулж хэргийн материалыг ил болгох зөвлөмжийг Засгийн газарт өгөөч ээ гэж хүсэж байгаа юм. Энэхүү хүсэлтэд өмгөөлөгчид бүгдээрээ гарын үсгээ зурсан.
Хэрэг нууцын зэрэглэлтэй учраас бидний ажиллаж байгаа хэргийн хүрээнд гэхэд шүүх дээр очоод 36 хавтас бүхий 15,600 хуудас материалыг үзэж танилцаад, тэмдэглэл үйлддэг. Ингээд үйлдсэн тэмдэглэлээ үлдээгээд гардаг. Бид робот биш. Тэмдэглэлээ эргэж санаад шүүх дээр мэтгэлцэнэ гэдэг маш хэцүү.
Үүнээс гадна нууцыг задруулбал эрүүгийн хариуцлага хүлээх нөхцөлд ажиллаж байхад нэр бүхий улстөрчид маш нууц хэргээс мэдээлэл задруулаад байдаг. Ингэхдээ өөрт ашигтай байж болохоор хэсгийг гаргаж ирээд олон нийтийг төөрөгдүүлээд байгаа.
Үүнийг залруулах гэхээр “Та нар төрийн нууц задруулахгүй шүү” гэж дарамтлаад байдаг. Тиймээс харилцан тэнцвэртэй байлгах үүднээс хэргийн материалыг ил болгох хэрэгтэй байна.
Цаг хугацааны хувьд аваад үзвэл 1998 онд үйлдэгдсэн гэмт хэргийг 21 жил шалгаж, гурван шатны шүүхээс шийдвэр гарчихсан. Ийм нөхцөлд нууцаас гаргах ёстой юм уу, үгүй юм уу үүнийг тодорхой болгож өгөөч.
Эрүүдэн шүүсэн гэх хэрэг дээр ч гэсэн үйл явдал зургаан хоног үргэлжилсэн гээд байгаа хэр нь 26 минутын бичлэгийг л гаргаж тавиад байгаа. Тухайн бичлэгийг гэхэд л эхлээд олон нийтэд үзүүлчихээд дараа нь Засгийн газрын хуралдаанаар оруулж, нууцаас гаргасан.
Хэргийн шүүх хурал үргэлжлэх явцад улстөрчид, хэвлэлийнхэн, олон улсын байгууллагууд албан ёсоор хандан шүүх хуралд оролцох хүсэлтээ илэрхийлсэн. Мөн иргэний нийгмийн байгууллагууд ч шүүхийн гадаа жагсаж, шүүх хуралдааныг нээлттэй явуулахыг шаардсан. Тал бүрээс ийнхүү хэргийн материалыг ил болгох, шүүх хурлыг нээлттэй явуулахыг шаардаж байгаа нь цаашлаад шүүхээ хардах үндэслэл болоод байгаа юм. Энэ нь цаашлаад талцал хуваагдалд хүргэж, үндэсний аюулгүй байдлыг бусниулах эрсдэлтэй учраас бид ҮАБЗ-д хандаж байна” хэмээн мэдэгдлээ.
