Эх сурвалж: ITOIM.MN
Иог нь хүний биед хэрхэн нөлөөлдөг, мөн аливаа өвчнийг анагаах боломжтой эсэх талаар Монголын Иогийн боловсролын институтийн захирал А.Болортуяатай ярилцлаа.
-Урилга хүлээн авсан баярлалаа. Та иогоор анх хэдэн онд хичээллэж эхэлсэн бэ. Ямар зорилгын үүднээс иогоор хичээллэх болсон бэ?
-Би Америкт байхдаа анх удаа иогоор хичээллэж, сурч эхэлсэн. Сургалтад очих үед багш маань надаас ямар зорилгоор иогоор хичээллэх тухай асууж байлаа. Тухайн үед би бөгтөр нуруутай байсан учир үүнийгээ засах, ээж минь элэгний асуудалтай байсан тул анагаах, мөн иог гэдэг зүйлийг насан туршийн зүйлээ болгохыг зорьж хичээллэж эхэлсэн. Америкт иогийн хичээлээ дууссаны дараахан Монголдоо ирж иогийн боловсролын институтийг нээгээд 10 гаруй жил болжээ.
-Иог нь хүний бие болоод сэтгэл санаанд ямар эерэг нөлөөтэй вэ?
-Эхлээд иог хэмээх ойлголтыг тодорхойлъё. Хүний сэтгэл маш нарийн эмзэг эрхтэн бөгөөд юманд амархан зовох, сэтгэлийн зовлонд амархан өртдөг учир их өвддөг. Тэгэхээр иог нь тухайн сэтгэлийн ямарваа нэг зовлон айдсыг ангид байлган хүнийг төлөв төвшин, амгалан байлгах гол зорилготой. Өөрөөр хэлбэл, хүний сэтгэлийг төвшин байлгахад сургах урлаг бөгөөд шинжлэх ухаан юм. Иогийн хичээл нь хөдөлгөөн дасгал, амьсгал, бясалгал үндсэн гурван хэсгээс бүрдэнэ. Хөдөлгөөн нь хүний махан биеийг цэвэрлэн хиргүй тунгалаг, эрүүл болгох үүрэгтэй бол амьсгалын дасгал нь бидний бие дотор эргэлдэн буй энергийн урсгалыг чөлөөлнө. Харин бясалгал нь хүний сэтгэл дотор байх элдэв шунал, тачаал мунхгаас гаргах юм. Энэ гурван хичээлийг бүгдийг хамтад нь хийж байж бидний бие гэдэг зүйл тэр чигээрээ эрүүл болно гэсэн үг.
-Дөнгөж хичээллэж эхлэх гэж буй хүмүүсийн түгээмэл гаргадаг алдаа юу байдаг вэ?
-Түгээмэл алдаа гэхээс илүү иог сутра буюу иогийн филисофид дадал гэсэн үг байдаг. Нийт иогийн гурван дадал байдаг бөгөөд суралцагч эдгээрийг анхаарвал зохистой. Нэгд, ямар нэгэн шалтаг байх ёсгүй. Хоёрт, иогийн дадал урт хугацаанд үргэлжилсэн байх ёстой. Гуравт, тухайн дадлыг яг л анх удаагаа хийж буй шиг сэтгэлээр хийх ёстой. Хэрэв энэ гурван дадлын аль нэг алдагдвал ямар ч үр дүнд хүрэхгүй, бууж өгөх болно. Тийм болохоор эхлээд зөв дадлыг бий болгох анхаарах хэрэгтэй юм шүү.
-Цар тахлын улмаас иргэд гэртээ хөл хорионд байгаа. Эдгээр хоногт иогоор хичээллээд үзвэл их зөв юм шиг санагдаж байна. Гэртээ хийх боломжит дасгалуудаас та жишээлэн дурдана уу. Мөн юуг маш сайн анхаарах хэрэгтэй бол?
-Ерөнхийдөө гэртээ байгаа хүмүүс нарны мөргөл болон сунаж мөргөх зэрэг дасгалыг хийгээд байхад гэмтэл учрахгүйгээр хийж болдог. Мөн онлайнаар иогоор хичээллэх боломжтой байдаг. Та иог хийхдээ чин сэтгэлээсээ, хэт их хичээхгүйгээр биеийн зөвхөн 20-30 хувийг л ашиглан хийх хэрэгтэй. Иогоор долоон наснаас дээш хүн бүхэн хичээллэх боломжтой байдаг. Хамгийн гол нь энэхүү урлагаар суралцан эхлэх гэж шийдсэн л бол тууштай байх нь хамгийн чухал юм.
-Иог нь олон төрлийн өвчнийг анагаах түлхүүр болж өгдөг гэсэн. Энэ хэр бодитой бэ?
-Иог хэрхэн өвчнийг эдгээхэд нөлөө үзүүлж байна вэ гэхээр тухайн хүн иогийн дасгал хийн булчингаа ажиллуулаад эхлэхээр хамгийн түрүүнд цусны эргэлт сайжирна. Цусны эргэлт сайжраад эхлэхээр булчингийн агшилт болон буцаж тэнийлтийн тусламжтайгаар мэдрэлийн систем нь тэнцвэржиж эхэлдэг. Мэдрэлийн систем нь тэнцвэржсэнээр хүн өөрийнхөө биеийг анзаарч ажиглан, итгэл үнэмшил сууна. Хүний амьсгал тэнцвэртэй эсвэл хэмнэл нь зөв болоод ирэхээр тайвширч, бүх юмыг тайвнаар хүлээж авч юу хийж байгаагаа анзаарч ажигласнаар яваандаа өвчин, эмгэг эдгэдэг. Тэгэхээр бүхий л төрлийн өвчин эдгэх боломжтой гэсэн үг юм. Нойргүйдэл, үргүйдэл, жирэмсний танос арилгах, өөрөөрөө төрж болохгүй гэсэн оноштой эмэгтэйчүүд өөрөөрөө төрөх, зүрхний хяналтад байгаа өвчтэй хүмүүс хүртэл халадтайгаа ирээд эдгэсэн тохиолдол байдаг. Харин гагцхүү өвчнөө эдгээхийн тулд хугацаа шаардлагатай гэдгийг маш сайн ойлгож ухамсарлах ёстой байдаг.
Аливаа нэг өвчин эдгэхдээ эмч, багш ч юм уу эсвэл юугаар эмчилж байгаа гэдэг арга барилд ер байдаггүй юм. Энэ нь бол тухайн өвчтөн өөрийн оролдлого итгэл үнэмшил хүсэл зэрэг дийлэнх 70 хувийг эзэлдэг бөгөөд энэ зүйл нь эдгэхэд хамгийн чухал байр суурь болдог. Бүх төрлийн өвчинг эдгээхийн тулд эхлээд сэтгэл санааг тайвшруулна. Дараа нь хоолны дэглэмээ зөв болгох хэрэгтэй. Өөрт тохирсон улирлын чанартай байгалийн гаралтай бүтээгдэхүүнийг хэрэглэнэ гэсэн үг. Тэгж байж хоол шингэх процессоо сайжруулах болно. Давхар хөдөлгөөн хийх шаардлагатай.
-Танаас нуруу өвдөлтийн талаар олон хүн хандан зөвлөгөө авдаг гэсэн. Энэ яг юунаас шалтгаалж өвддөг бол мөн ямар арга хэмжээ авах хэрэгтэй вэ?
-Нурууны өвчний шалтгааныг эмчлэх аргыг бараг сүүлийн дөрвөн жил эрж хайж, оролдлоо. Шалтгаан нь ерөнхийдөө уламжлалт буюу аюурведаар бол хийн өвчин юм. Тэгэхээр энэ өвчтэй хүмүүс эхлээд өвчний шалгаан болоод яг ямар шатандаа явж буйг мэдэх, ойлгох хэрэгтэй. Зөвхөн хөдөлгөөнгүйгээс болоод булчингийн зангирлын асуудал бол дороо буюу бараг сар гаран хичээллээд л зүгээр болчихдог.
Гэтэл нэлээд дотроосоо эд эсүүд нь шим тэжээлээ авахаа больсон, өөрөөр хэлбэл тухайн нурууны өвчнийг үүсгэж буй эрхтэн системд доголдол гарсан бол сэтгэл санаа, стресс, хоололт, амьдралын хэв маяг өөрийнх нь баланс ясны тэнцвэрт байдал тэгш хэм гээд энэ бүгдийг засаж таардаг учир удаан хугацааны эмчилгээ болох юм. Тухайн хандаж буй хүмүүсийн эхлээд нурууны өвчний шалтгааныг нь олоод дараа нь нэг, хоёр, гурав гэсэн зэрэглэлд хуваан хичээллэж байна. Мөн энэ талаар мэргэшсэн төв нээх тухай ч бодож байгаа.
-Aюурвед гэж юу вэ. Энэ талаар тайлбарлан өгнө үү. Ямар хүмүүс суралцах хэрэгтэй бол?
-Аюурвед гэж гайхамшигтай зүйл байдаг. Энэтхэгээс үүсэлтэй амьдралын шинжлэх ухаан юм. Манай уламжлалт анагаах ухааны эх суурь нь аюур байдаг.
Аюурведийн мэдлэг гэхээр бид нар байгаль дэлхийтэйгээ хэрхэн зохицож амьдрах хэрэгтэй, хүн ер нь яагаад зовж өвдөөд байдаг вэ, мөн өвчнөө анагаахын тулд хэрхэн байгальтайгаа харьцах, таван махбодь гэж юуг хэлээд байгаа гэх эдгээр онолыг заах гайхалтай мэдлэг юм. Үүнийг мэдэхгүйгээр амьдарна гэдэг бас л харанхуй дунд хаачихаа мэдэхгүй яваатай адил гэж хэлж болно. Уг мэдлэгийг хүн бүр сурах шаардлагатай.
Монголд уламжлалт анагаах ухаан нь хүнийг өвдсөн хойно нь эдгээх гэсэн чиглэлээр илүү хөгжсөн байдаг боловч өвдөхөөсөө өмнө бид нар яг юуг анхаарч байх, юуг мэдэж байх хэрэгтэй гэсэн чиглэлд анхаарч, хөгжөөгүй байдаг. Тиймээс энэ чиглэлийг түлхүү барьж иогийн багш болон суралцагчдадаа зааж, сургаж байгаа. Аюурведийн үндэс, шим тэжээл, цэвэрлэгээ гэсэн гурван төрлийн сургалтыг тогтмол явуулж эхэлсэн.
-Ярилцсанд баярлалаа.
