БОАЖЯ байгалийн нөөцийг нэмэх, зориуд орчинд тарималжуулахаар 7-8 зүйл ургамлыг судалж, ашиглалтын нөөц бүрдүүлнэ.
Тодруулбал, энэ онд халиар, сонгино, дагуур хүж өвс, ирэх онд үлдэн могой идээ, булцуут туйпланцар, 2023 онд шивүүрт цульхир, үсхий суль, 2024 онд эгэлбавран, Азийн төлөгч өвс гол зүйлийг тарималжуулж, эдгээрийн байгалийн нөөцийг хамгаалах бодлого хэрэгжүүлэх юм.
Эмийн түүхий эдэд ашиглан, сүүлийн жилүүдэд экспортод гаргаснаар монгол хунчир, дэрвэгэр жиргэрүү, урал чихэр өвс, их шүүдэргэнэ, нарий навчит цахилдагийн нөөц багасаж, хэт ашиглалтад өртжээ. Иймд зориудаар 3-4 зүйлийг нь тарималжуулан, бүтээгдэхүүн үйлдвэрлэж, дотоодод эмийн зориулалтаар ашиглан, мөн экспортолж байгаа.
Түүнчлэн, өнгөрсөн онд хоёр тойргийн ургамлын судалгаа шинжилгээ хийжээ. Энэ онд Хангайн уулын, ойт хээрийн тойрогт, ирэх онд Хөвсгөлийн уулын тайгын тойрог, Ховдын уулын цөлжсөн хээрийн тойрогт хийх юм.
Улмаар 2023 онд Монгол Алтайн уулын хээрийн тойрог, Их нууруудын хотгорын цөлөрхөг хээрийн тойрог, 2024 онд Дорнод Монголын хээрийн тойрог, Хянганы уулын нугат хээрийн тойрогт судалгаа үргэлжлүүлэхэд жил бүр 120 сая төгрөг зарцуулахаар төлөвлөжээ.
Монгол Улсын Засгийн газрын 2020-2024 оны үйл ажиллагааны хөтөлбөрт ховор амьтан, ургамлыг зориудаар өсгөн үржүүлж, ашиглалтын нөөц бүрдүүлэх зорилт дэвшүүлсэн. Энэ хүрээнд хийж, хэрэгжүүлэх төлөвлөгөө, стратегийн талаар БОАЖЯ-ны Амьтан, ургамал, байгалийн нөөцийн хэлтсийн дарга П.Цогтсайхан мэдээлэл өгөв.
Тэрбээр ярихдаа, “БОАЖЯ 2020 онд байгалийн экологийн ургамлын 1050 зүйл ургамлын экологи эдийн засгийн үнэлгээ хийсэн нь байгалийн ургамлын нөөц, зүйлийг үнэлж байгаа хэрэг. Байгаль орчин, уур амьсгалын өөрчлөлт, бэлчээрийн болон ургамлын нөөцийн хэт ашиглалт нь ургамалд сөргөөр нөлөөлснөөр бүрхэвч нь багасаж, хөрс цөлжсөөр байна. Иймд ургамлын зүйлийг хамгаалах, өсгөн үржүүлэх, зориуд тарималжуулах, ургамлын нөөцөд нөлөөлж байгаа хүчин зүйлийг цөөлөхөд БОАЖЯ анхаарч байгаа”-г хэлэв.
Монгол орны байгалийн ургамлын 6 бүс бүслүүрт мөөг 574, замаг 2003, хаг 1056, хөвд 5800 зүйл мөн гуурст ургамал 3160 зүйл бий. Монгол оронд нийт 7737 зүйлийн ургамал тархсан статистик тоо байдаг.
