Афганистаны нийслэл Кабул хотын Боловсролын захиргаанаас 12-оос дээш насны охидыг олны өмнө, олон нийтийн газар дуулахыг хоригложээ. Уг шийдвэрийг ямар үндэслэлтэйгээр гаргасан талаар тус улсын боловсролын яам шалгаж буй аж.
Түүнчлэн энэ шийдвэрийг маш олон иргэн олон нийтийн сүлжээгээр шүүмжилж, #IAmMySong хаштаг ашиглан охид өөрсдийн дуулж буй бичлэгээ цахим орчинд хуваалцаж эхэлсэн байна.
Афганистаны Засгийн газар Талибан хөдөлгөөнийхөнтэй энхийн гэрээ байгуулахаар хэлэлцээг үргэлжилж буй. Ийм цаг үед дээрх асуудал гарсан нь афганчуудын санааг зовоож байна.
Кабул хотын Боловсролын захиргааны мэдэгдэлд 12 ба түүнээс дээш насны охидыг сургууль дээрээ дуулахыг хориглосноос гадна, дуу хөгжмийн хичээлийг эрэгтэй багшаар оруулахыг хоригложээ.
Уг хоригийг хэд хоногийн өмнө зарласан даруйд олны шүүмжлэлийг дагуулсан юм. Үүнийг утга зохиолын ажилтнууд сурч боловсрох эрхэд ухралт хийсэн алхам боллоо хэмээн үзжээ.
Тус улсын хамгийн алдартай эмэгтэй зохиолчдын нэг, яруу найрагч Шафика Хпалвак өөрийн твиттер хуудсандаа “Бурхан минь, биднийг өршөөгөөрэй. Хүн төрөлхтөн хүүхдүүдээ хүртэл хүйсээр нь ялгаварлаж чаддаг харгис хэрцгий аж” хэмээн бичжээ.
2001 онд дуусгавар болсон Талибаны дэглэмийн үед охидыг сургуульд явахыг зогсоож, ихэнх дуу хөгжмийг хориглож байсан юм. Энэ цаг үе эргэж ирэх вий хэмээн тус улсын иргэд болгоомжилж буй аж.
“Энэ бол манай Бүгд найрамдах улс дотроосоо талибанчлагдаж буйн илрэл” хэмээн Афганистаны хүний эрхийн төлөө 40 шахам жил ажилласан тэмцэгч Сима Самар Ассошиэйтэд Пресс агентлагт ярилцлага өгөхдөө дурдсан байна.
