Өнгөрсөн амралтын өдрүүдэд Монгол Улсын нутаг дэвсгэрээр дайран өнгөрсөн хүчтэй элсэн шуурга даваа гаригт БНХАУ-ын 12 мужийг дайрч, мягмар гаригт Өмнөд Солонгосын эх газарт хүрсэн байна.
Өмнөд Солонгосын Байгаль орчны корпорацийн мэдээлснээр даваа гаригт Сөүл хотын агаар дахь нарийн ширхэгт “PM2.5”-ын хэмжээ куб метр тутамд 76 микрограмм хүрчээ. Тиймээс тус улс нийслэл болон Кёнги мужийн 13 хотод агаарын чанарыг сэрэмжлүүлэх онц байдал зарласан байна.
Харин Өмнөд Солонгосын хэвлэл мэдээллийн хэрэгслүүд болон тус улсын иргэд интернэт орчинд жил бүрийн хавар тогтмол болдог энэхүү элсэн шуурганы нөлөөнд БНХАУ-ыг эрс буруутгаж, энэхүү үзэгдэл нь тус улсын байгаль орчинд ихээхэн хохирол дагуулж байгааг шүүмжилсэн юм. Тухайлбал, БНСУ-ын “Yonhap” агентлаг мягмар гаригт тус улсын баруун хэсгийг хамарсан элсэн шуурга нь Хятадын эх газраас үүдэлтэй хэмжээн мэдээлжээ.
Тэгвэл БНХАУ-ын Гадаад хэргийн яамны хэвлэлийн төлөөлөгч Жао Лижян “Yonhap” тэргүүтэй Өмнөд Солонгосын хэвлэлүүдээр гарсан мэдээллийг няцаасан байна. Тэрээр даваа гаригт Хятадын газар нутгийг дайрсан элсэн шуурга тус улсын гадна талаас ирсэн бөгөөд хэвлэл мэдээллийн хэрэгслүүд энэ асуудлаар шинжлэх ухааны үндэслэлтэй, бодитой мэдээлэл өгөхийг уриалсан юм.
Жао Лижян энэ талаар “Элсэн шуурга Хятадыг дайран өнгөрсөн. Монгол Улсын холбогдох байгууллагууд шуурганы улмаас учирсан хохирлын талаар албан ёсны мэдээлэл өгсөн. Гэвч Хятадын олон нийтийн байр суурь элсэн шуурга Монголоос эхтэй байж болзошгүй талаар шүүмжлэл өрнүүлээгүй. Асуудлыг шинжлэх ухаанч, бүтээлч байдлаар авч үзэх хэрэгтэй. Шаардлагагүй таамаглал, санамсаргүй тодорхойлолт хийхээс зайлсхийхийн тулд олон нийтийн санаа бодлыг зөв зүгт чиглүүлэх хэрэгтэй” гэжээ.
Өмнөд Солонгосын хэвлэлүүд элсэн шуурганд БНХАУ-г буруутгасан тухай мэдээлэл өчигдөр Хятадын “Sino Weibo” сүлжээнд интернэт хэрэглэгчдийн гол ярианы сэдэв болж 340 сая хандалт авч, 16 мянган сэтгэгдэл бичигдсэн аж. Зарим иргэн Өмнөд Солонгосын хэвлэлүүд БНХАУ-ыг “бохирдол үүсгэгч орон” гэх имиж бүрдүүлэх зорилгоор хуурамч мэдээлэл түгээж байна. Нэг талыг барьсан энэ төрлийн мэдээлэл нь хоёр орны харилцааны хурцадмал байдлыг улам нэмэгдүүлж болзошгүй гэх сэтгэгдэл илэрхийлсэн талаар “Global Times” мэдээлжээ.
Мөн БНХАУ-ын эрх баригч Коммунист намын гол хэвлэл болох “Global Times”-т Өмнөд Солонгосоос гадна дэлхийн бусад орны хэвлэлүүд элсэн шуурга Хятадаас эхтэй бөгөөд үүний улмаас үүдсэн байгалийн гамшгийн хариуцлагыг тус улс хүлээх ёстой гэж мэдээлсэн талаар онцолсон юм.
БНХАУ-ын Шинжлэх ухааны академийн Агаар мандлын физикийн хүрээлэнгийн эрдэм шинжилгээний ажилтан Ван Гэнчэнь мягмар гаригт “Global Times” хэвлэлд “Мягмар гаригт Өмнөд Солонгост хүрсэн элсэн шуурга Монголоос ӨМӨЗО-ны зүүн өмнөд хэсгээр туугдан Солонгосын хойгт хүрсэн” гэж мэдээлсэн байна. Харин БНХАУ-ын Цаг уурын үндэсний төвийн захирал Сүн Лианчун “Цаг уурын хиймэл дагуулын мэдээллээс элсэн шуурга Монголоос эхтэй болохыг тодорхой харж болно. Улмаар салхины чиглэлд туугдсаар элсэн шуурга Хятад, Өмнөд Солонгос төдийгүй бусад оронд хүрнэ. Цаг уурын шинжилгээгээр элсэн шуурганаас өмнө Монгол орны нутаг дэвсгэр гадаргын өндөр температуртай, хур тунадас бага байсан нь тогтоогдсон. Үүний дээр зүүн зүгт чиглэсэн ер бусын хүчтэй циклон нь их хэмжээний элсийг тууж, элсэн шуурга үүсэх нөхцөлийг бүрдүүлсэн” гэжээ.
Цаг уурын өөрчлөлттэй холбоотойгоор Монгол Улсын экологийн асуудал хурцаар тавигдах болсон. Манай улсын нийт газар нутгийн 70 орчим хувь нь харилцан адилгүй түвшинд цөлжилтөд нэрвэгдэж, улмаар цөлжилт цаашид тасралтгүй нэмэгдэх хандлага ажиглагдаж байгаа юм.
