ЭМЯ болон ХӨСҮТ-өөс Монгол Улс дахь коронавирусийн нөхцөл байдал, дархлаажуулалтын явцын талаарх мэдээг 2021.03.18-ны байдлаар танилцууллаа. Өнөөдрийн уламжлалт хэвлэлийн хуралд ХӨСҮТ-ийн Тандалт, судалгааны албаны дарга асан А.Амбасэлмаа оролцож, сүүлийн үед нийслэлийн тодорхой байршлуудад хэрэгжиж буй өргөтгөсөн тандалт судалгааны талаар мэдээлэл өглөө.
А.Амбасэлмаа: Монгол Улс дэлхий дахинд “COVID-19” цар тахал бүртгэгдсэнээс хойш олон улсын авч хэрэгжүүлж байгаа болон өөрийн орны нөхцөл байдалд тохирсон хариу арга хэмжээнүүдийг хэрэгжүүлж ирсэн. Тухайлбал, өвчлөл бүртгэгдээгүй үед авах хариу арга хэмжээ, халдвар зөөрлөгдөн орж ирсэн тохиолдолд хэрэгжүүлэх арга хэмжээ, кластер өвчлөлийн үед ямар арга хэмжээ авах уу гэх зэргээр халдварын тархалтыг нэлээд хугацаанд барьж ажилласан.
Цар тахлын үед тухайн улсын хүн ам нийтээрээ халдварт өртөх эрсдэлтэй байдаг. Өнөөдрийн хувьд нийслэлийн хэмжээнд хүн амын дунд коронавирусийн халдвар нэлээд өргөн хүрээтэй тархаад байна. Тиймээс энэ үед тохирсон хариу арга хэмжээг хэрэгжүүлж ажиллах ёстой. Үүний дагуу хүн амын дунд халдвар өргөн хүрээтэй тархсан тохиолдолд өвчлөл нэмэгдэж байна гээд бүртгээд суухгүй. Өвчлөл хаана олон бүртгэгдэж байна, тэнд эрсдэл өндөр байна. Халдвар тархах нөхцөл байдал ямар байна вэ гэдэгт тохируулсан хариу арга хэмжээ хэрэгжүүлэх стратеги байдаг.
Хариу арга хэмжээ буюу голомтын өргөжүүлсэн тандалтыг зохион байгуулахын тулд нэгд, тухайн нутаг дэвсгэрийн хүн амын дунд илрүүлэг хийх. Хоёрт, халдвар гарсан байр орон сууцанд халдварын ариутгал хийх. Гуравт, дархлаажуулалт хийх. Дөрөвт, нийгмийн хариу арга хэмжээ, эрүүл мэндийн сурталчилгаа хийх гэсэн иж бүрэн арга хэмжээг хэрэгжүүлж явах ёстой. Цаашид ч энэ арга хэмжээг өргөжүүлж явна.
Нийслэлийн хэмжээнд хэд хэдэн дүүрэгт халдварын эрсдэл өндөр байна. Халдварын эрсдэл өндөр байгаа байршлуудад хариу арга хэмжээ хэрэгжүүлнэ. Тухайлбал, нийслэлийн хамгийн олон хүн амтай, байшин хороолол ихтэй Баянзүрх дүүргийн 26-р хороонд сүүлийн 14 хоногт нийт 36 байршилд 54 тохиолдол бүртгэгдсэн. Энэ 54 тохиолдлын ойрын хавьтал 200 гаруй хүн байна. Сүүлийн үед өвчлөл огцом нэмэгдсэн байдлаас дүн шинжилгээ хийхэд халдвар авсан нэг хүний ард 3-4 хүн халдвар авах эрсдэлтэй байна. Тиймээс 54 хүний ард хэдэн хүн халдвар авах эрсдэлтэй гэдэг нь тодорхой харагдах болов уу. Ойрын хавьтлуудын 20 гаруй хувь нь халдварт өртөж байна. Тиймээс эдгээр эрсдэлээс сэргийлж, эрсдэл үүсгэхгүй, тухайн нутаг дэвсгэрт халдварыг бууруулахын тулд 2021 оны гуравдугаар сарын 17-ны өдрөөс эхлээд өргөжүүлсэн тандалтыг зохион байгуулж, богино хугацааны хөл хориог тогтоон ажиллаж байна.
Баянзүрх дүүргийн иргэд уг үйл ажиллагаанд идэвхтэй оролцож байна. Өчигдрийн байдлаар Баянзүрх дүүргийн 26-р хорооны нийт шинжилгээнд хамруулбал зохих хүн амын 60 гаруй хувь нь шинжилгээнд хамрагдаад байна. Өнөөдөртөө үлдсэн 40 орчим хувь нь шинжилгээндээ хамрагдана. Ингээд бид Баянзүрх дүүргийн 26-р хорооны зарим байр, орон сууц, гудамжуудад ариутгал хийнэ. Мөн 50-65 насны болон хөгжлийн бэрхшээлтэй хүмүүсийг вакцинжуулах үйл ажиллагаа давхар зохион байгуулагдана. Тиймээс Баянзүрх дүүргийн 26-р хорооны иргэдийг үйл ажиллагаанд идэвхтэй оролцохыг уриалъя.
Хан-Уул дүүргийн 15-р хороонд өнөөдрөөс хэсэгчилсэн байдлаар өргөтгөсөн тандалт судалгааны ажил зохион байгуулж эхэллээ. Энэ бол халдвар тархалт нэмэгдсэн үед хэсэгчилсэн хөл хорио тогтоож, халдварын тархалтыг бууруулах тандалт судалгааны ажил гэдгийг манай ард түмэн ойлгож хүлээж авахыг хүсэж байна. Цаашид ч халдвар голомтлон гарсан байршлуудад өргөтгөсөн тандалт судалгаа хийгдэнэ.
Үүний зэрэгцээ вакцинжуулалт эхэлсэнтэй холбоотойгоор ард иргэдийн дунд тайвшрал үүссэн байна. Вакцин хийлгэхийн сацуу амны хаалтаа зүүх, хүн хоорондын зайгаа баримтлах, хувийн ариун цэвэр, эрүүл ахуйгаа сахих зэрэг арга хэмжээгээ нийлүүлж, хослуулж байж бид цар тахлаас сэргийлнэ. Вакцин хийлгэсний дараа дархлаа бүрэн тогтоогүй байхад хувийн хамгаалалт, бусдад халдвар дамжуулахгүй байхад онцгой анхаарах хэрэгтэй гэлээ.
