УИХ-ын Н.Алтанхуяг: Дээд шүүхээс хоёр хүний нэр оруулж ирэх ёстой. Гэтэл яагаад Эрдэнэбулган гэж нэг хүнийг оруулж ирэв. Энэ хүнийг дэмжихэд татгалзахгүй. Энэ хоёр хүний бүрэн эрхийн хугацаа дуусаад нэг жил дөрвөн сар болсон. Энэ нь Үндсэн хууль зөрчиж байгаа. Энэ хоёр хүн долоон жил дөрвөн сар сууж Цэцийн гишүүнээр ажиллаж байна. Дээд шүүхээс зориуд нэг хүн гаргаж ирээд хугацаа нь дууссан хоёр хүний нэгийг болиулъя гэсэн байнгын хорооны тогтоолд шууд Ш.Цогтоог чөлөөлнө гэнэ. Үндэслэл нь бүрэн эрхийн хугацаа нь дууссан учраас гэж. Бүрэн эрхийн хугацаа нь дууссан бол хоёулаа л дууссан. Цэц дээр нэг хурал болсон ч юм шиг болоогүй ч юм шиг байна. Тэр хурал дээр нь Ш.Цогтоо нь оролцсон ч юм шиг. Ш.Цогтоог нь сугалж алга болгох гэж зориуд зохион байгуулж байна уу. Төрийн ажил ингэж явахгүй л дээ. МАН-ын бүлгийнхнийг үүнийгээ хуулийн дагуу зохион байгуулаач ээ гэж хүсч байна. Цэцийн шийдвэр нь юу болсон юм бэ. Ерөнхийлөгчийн сонгууль болсны дараа энэ улс чинь үлдэх юм байгаа биз дээ. Жоомоо алах гээд байшингаа шатаана гэдэг шиг улсаа нураалаа, Цэцээ нураалаа. Бүх юмаа нураах гэж байна.
УИХ-ын гишүүн С.Бямбацогт: 2019 оны арванхоёрдугаар сард хугацаа нь дууссан. Хугацаа нь дууссан цэцийн гишүүний санал болгосон газар дараагийн хүнээ санал болгох ёстой. Дээд шүүх рүү УИХ-ын дарга, Хууль зүйн сайд болон би “Цэцийн гишүүдийн хугацаа дууссан байна. Үндсэн хууль зөрчөөд байна. Дараагийн хүнээ нэр дэвшүүл” гэж олон удаа бичиг явуулсан. Гэтэл ирүүлээгүй. Харин гуравдугаар сарын 1-нээс Шүүхийн тухай хууль хэрэгжиж эхлэхэд сонгон шалгаруулалт явуулсан. Үүнээс нэг хүн олонхийн санал авсан юм байна. Бусад нь олонхийн санал авч чадаагүй юм байна.
УИХ-ын гишүүн Ш.Адьшаа: Эрдэнэбулган нэр дэвшигчийг дэмжиж байгаа. Шударга ажиллахыг хүсч байна. УИХ хууль дээдлэх зарчим байгаа юм уу, үгүй юм уу. Бямбацогт дарга худлаа хэлдгээ боль. Байнгын хороон дээр яригдаагүй асуудлыг УИХ-ын тогтоол болгож оруулж ирж байгаа чинь ямар учиртай юм бэ. Горимын санал гаргая гэхээр гаргаж болдоггүй. Үндсэн хууль, УИХ-ын Дэгийн тухай хуулийг зөрчиж байна шүү. Өнөөдөр цэц дээр маргаан шийдвэрлэж байгаа Цэцийн гишүүнийг улс төрийн зорилгоор, захиа даалгавар нийлүүлэхгүй байна гэдгээр үндэслэлээр чөлөөлбөл улс төрийн хямрал болж хувирна.
УИХ-ын гишүүн С.Бямбацогт: Байнгын хорооны хуралдаан нээлттэй явсан. Яриагүй асуудлыг ярьсангүй гэж хэлээгүй. Хуучин дээд шүүхээс тэр хүний оронд тэрийг томилуулъя гэж оруулж ирдэг жишиг байсан юм билээ. 2018 онд Ерөнхийлөгч Цэцийн гурван гишүүнийг санал болгосон. Үүнтэй адилхан оруулж ирсэн бол асуудал дагуулахгүй байсан. Өчигдөр Дээд шүүхээс ирсэн хүмүүсээс ямар зарчим баримталсан, хоёр хүний хэнийг нь оруулаад хэнийг нь болиулах вэ гэдгийг асуусан.
УИХ-ын гишүүн Х.Баделхан: Үндсэн хуулийн цэцийн 9 гишүүний хэдийнх нь хугацаа дууссан юм бэ. Хугацаа дууссан хоёр хүний нэгнийх нь оронд хүн томилж байгаа юм байна. Дараагийн үнийг нь хэзээ оруулах вэ. Хоёр гишүүний хугацаа нь дуусаад бүтэн жил дөрвөн болж байхад яагаад хариуцлага тооцдоггүй юм бэ.
Монголын нийгэм шударга ёсыг хүсч байна. Ялангуяа, шүүхийн байгууллагаас шударга ёсыг хүсч байна. Цэц дээр болж байгаа асуудалд нэр дэвшигч ямар бодолтой байдаг вэ.
УИХ-ын гишүүн С.Бямбацогт: Хоёр хүний хэнийх нь оронд томилох вэ гэдэг асуудлыг ярьсан. Төрийн албаны тухай хуульд төрийн албан хаагч 65-аас доош байна гэж заасан. Цэцийн хуульд мөн Цэцийн гишүүний насны дээд хязгаар 65 гэж заасан. Ш.Цогтоо гишүүн 67 настай, Солонго гишүүн 63 настай. Тиймээс Ш.Цогтоо гишүүнийг чөлөөлөх нь зүйтэй гэж ярьсан. Тиймээс байнгын хороо санал дүгнэлтээ оруулж ирж байна.
Нэр дэвшигч Ж.Эрдэнэбулган: Шударга ёсны асуудал бол хуульчдын гол зарчим. Эрүүгийн хэрэгтэй холбоотой асуудлыг холбогдох шүүх нь шийдвэрээ гаргасан. Тиймээс би байр суурь илэрхийлэх боломжгүй гэж үзэж байна. Цэцэд болж байгаа асуудлыг хэвлэл мэдээллийн хэрэгслийн хүрээнд сонсож байгаа. Хуульч аливаа асуудлыг шийдвэрлэхдээ тодорхой нотлох баримтын хүрээнд шийдвэр гаргадаг.
