ХӨСҮТ-ийн дэд захирал Ж.Байгалмаа халдварын нөхцөл байдлын талаар сэтгүүлчдийн асуултад хариулт өглөө.
-Манай улсад PCR шинжилгээгээр хуурамч эерэг гарсан тохиолдол байгаа юу?
-Монгол Улсад хэрэглэгдэж байгаа PCR шинжилгээний оношлуур ДЭМБ-ын яаралтай горимоор хэрэглэх оношлуур. Мэдрэг болон өвөрмөц чанар маш өндөр хувьтай байгаа. Манай улсад хийгдэж байгаа бүх шинжилгээнд ХӨСҮТ-д чанарын хяналт хийгээд явдаг. Бүх хийж байгаа шинжилгээ 100 хувь баталгаажиж байгаа.
-Хүнс тээврийн жолооч нар PCR шинжилгээ өгч хот хооронд зорчиж байна. Гэхдээ PCR шинжилгээ өгөх гэж удан хүлээж байна. Үүнийг зохицуулах боломж байх уу?
-Манайд хийж байгаа шинжилгээнүүд аль болох 24 цагтаа хариу нь гараад явдаг. Дүүргүүдээс ирсэн шинжилгээ дүүрэг дээрээ хийгдээд дараа нь ХӨСҮТ-д авчирч ирж хяналт хийдэг. Тэгэхээр 24 цагаасаа хэтрэх тохиолдол гарч байгаа.
-Ойрын хавьтал гэдгийг хэрхэн тодорхойлох вэ. Масктай уулзсан хүн ойрын хавьтал болох уу?
-Амны хаалтаа зүүгээгүй, зай бариагүй, хамт хоол идсэн гэх мэт харилцаанд орсон хүмүүсийг ойрын хавьтал гэж байгаа. Мөн 15 минут буюу түүнээс дээш хугацаагаар харьцсан тохиолдлыг ойрын хавтал гэж үзнэ. Үүнээс бусад тохиолдолд өөрийгөө ойрын хавьтал гэж үзэх шаардлагагүй.
-Эмч, эмнэлгийн ажилтны ачаалал хэр байна вэ?
-Эмнэлэг болон шуурхай арга хэмжээний багийн ачаалал нэмэгдсэн. Бид хоногт бүртгэгдэх тохиолдлыг тоо 100, 200 гэж ярьдаг байсан. Гэтэл одоо 700, 800 гэж байна. Хоногт бүртгэгдэх тохиолдлын тоо нэмэгдэх тусам бидний ачаалал нэмэгдэнэ. Цаашдаа ч өдөрт бүртгэгдэх тохиолдлын тоо нэмэгдэх хандлагатай байна. Ачаалалтайгаа уялдуулаад ор дэлгэх асуудлаа шийдээд явж байна. Өдөрт бүртгэгдэх тохиолдын тоо 400 хүрнэ гэсэн тооцоог хийсний үндсэн дээр орон нутгаас нэмэлт баг авчирч байсан. Гэтэл өнөөдөр 600, 700 хүрч байна. Нэмж 48 баг гаргаад шуурхай арга хэмжээний үйл ажиллагаанд оролцоод явж байна. Багаа өргөжүүлж байгаа ч ачаалал маш их нэмэгдэж байна.
-Цаашдаа өвчлөл энэ хэмжээгээр нэмэгдвэл ямар арга хэмжээ авахаар төлөвлөж байгаа вэ?
-Олон улсын практикт халдварын тархалтын шатнаас хамаараад хариу арга хэмжээ авч байна. Дэлхий нийтэд дөрвөн шатны хариу арга хэмжээ аваад явж байна. Нэгд, халдвар бүртгэгдээгүй буюу тэг шат, хоёрт, зөөвөрлөгдсөн шат, гуравт, халдварын голомтолсон шат, дөрөвт, хүн амын дунд өргөн тархсан шат байна. Улаанбаатар хотод хүн амын дунд тархсан гэж үзэж байгаа. Энэ тохиолдолд хөл хорио тогтоох шаардлагатай. Бид энэ саналаа УОК-т тогтмол хүргүүлж байгаа.
-Эмч эмнэлгийн ажилтнууд халдвар авч байгаа юу. Өнөөдрийн байдлаар хэдэн эмч эмнэлгийн ажилтан халдвар аваад байна вэ?
-Эрүүл мэндийн ажилтнуудын халдварын нөхцөл байдлыг долоо хоногоор аваад явдаг. Өнгөрсөн долоо хоног буюу дөрөвдүгээр сарын 5-ны байдлаар улсын хэмжээнд 354 эрүүл мэндийн ажилтан халдвар авсан байна. Энэ нь нийт халдварын 3.6 хувийг эзэлж байгаа. 354 хүний 70 хувь нь ажил үүргээ гүйцэтгэж байхдаа халдвар авсан бол 30 хувь нь хүн амын дундаас халдвар авсан байна. Энэ тоо тогтвортой өссөөр байна.
-Вакцины нэгдүгээр тунгаа хийлгэсэн хичээн хүн халдвар аваад байгаа вэ?
-Одоогоор 732 хүн нэгдүгээр тун авсны дараа халдвар авсан байна. 60 гаруй хувь нь вакцин хийлгэсэн 14 хоног дотроо халдвар авсан байна.
