Дэлхийн эрүүл мэндийн байгууллагаас Монгол Улсын хүн амын 1 хувь буюу 32700 хүн Ковид-19-ийн халдвар авч болзошгүй гэх урьдчилсан таамаг гаргаж орны нөөцөө бэлдэх зөвлөмжийг өгч байсан.
Энэ талаар өнгөрсөн оны арванхоёрдугаар сарын 24-ний өдөр болсон чуулганы хуралдаанаар ЭМЯ-ны Төрийн нарийн бичгийн дарга асан Я.Амаржаргал хэлж байв. Тухайн үед Монгол Улсад нийт батлагдсан тохиолдол 1069 болж, 476 хүн эмчлүүлж байлаа.
Тэгвэл ЭМЯ-ны хэлтсийн дарга Г.Болдмаагаас энэ тооцоолол хэвээрээ эсэх, цаашид хэрхэн өөрчлөгдөх талаар тодруулсан юм.
“Тавдугаар сарын 20-ныг халдварын оргил үе гэж үзэж байгаа бөгөөд дархлаажуулалтын үйл явц 90 хувьтай байсан ч өдөрт дунджаар 4000 хүнээс коронавирус илрэх магадлалтай гэсэн тооцоолол гарсан. Яаралтай хөл хорио тогтоохгүй бол тав, зургаадугаар сар гээд цааш энэ байдал үргэлжлээд явна” гэлээ.
“Тэгэхээр 14-21 хоногийн хөл хорио хангалтгүй байна гэж ойлгож болох уу?” гэх асуултад “Боломжтой бол тэрнээс дээш хугацаанд хөл хорио тогтоох нь зүйтэй. Яаралтай хөл хорио тогтоох, тэгэхдээ удаан хугацаанд хатуу чанга тогтоох нь илүү үр дүнтэй. Жишээ нь, Ухань хот маш удаан хугацаанд хязгаарлалтад байсан. 76 хоногийн хорио тогтоож байж халдварын тархалтыг намжаасан. Манайд энэ хэвээр үргэлжилбэл өдөр тутамд нас баралт нэмэгдэнэ.
Хөл хорионоос гадна хүмүүсийн өөрсдийнх нь ухамсар маш чухал байна. Хөл хорио тогтоосон үед хулгайн замаар орон нутаг руу явах гэх мэт маш олон асуудал гарч байна. Хөл хориотой зэрэгцээд иргэдээ вакцинд хамруулах хэрэгтэй. Энэ бол нэгээс хоёр сарын л асуудал” гэлээ.
