ЭМЯ-ны хэвлэлийн төлөөлөгч Б.Ууганбаяр мэдээллийг өглөө.
Тэрээр “Улаанбаатар хотод дархлаажуулалтын ажил эхэлсэн 24 цагийн дотор 58319 хүн вакцинаа хийлгэсэн байна. Улаанбаатар хотод нэгдүгээр тунд 502978 хамрагдсан бол хоёрдугаар тунд 114359 хүн хамрагдсан бол орон нутагт нэгдүгээр тунд 148,082 хүн, хоёрдугаар тунд 3768 хүнд вакцинд хамрагджээ. Вакцинжуулалтад 40-69 насныхан, эрсдэл бүлгийнхэн буюу 50-аас дээш насныхан өндөр хамрагдсан байна” гэлээ.
ЭМЯ-ны Нийтийн эрүүл мэндийн тусламжийн бодлогын хэрэгжилтийг зохицуулах газрын дарга Л.Энхсайхан: Өнөөдрийн байдлаар нийт хүн амын 31.4 хувь нь вакцинд хамрагдаад байна. Шинж тэмдэггүй халдвартай иргэд, шинэ тохиолдлууд, нас баралт нэмэгдэж байгаа тул вакцинд хамрагдаж байгаа хүмүүсийн хувьд хоорондын зай барьж, оочерлож, эрсдэл үүсгэхгүй байхыг хүсье. Түүнчлэн вакцины хоёрдугаар тунгаа хийлгэсэн хүмүүс маскгүй явмаар байна гэж байна. Вакцины хоёр тунгаа хийлгэсэн ч халдвараар өөрөө хөнгөн өвчлөх, бусдад халдварлуулах эрсдэлтэй тул халдвар хамгааллын дэглэмээ байнга сахиж, амны хаалтаа зүүх хэрэгтэй.
Өнөөдөр нийслэлийн 114 цэгт 1789 эмч эмнэлгийн ажилчид 58000 гаруй хүнийг вакцинжуулах төлөвлөгөөтэй байна. Тэр хүмүүст утсанд нь мессеж очиж, мэдээлэл хүрсэн байгаа. Хэрэв утсаар холбогдоогүй бол сандрах хэрэггүй. Эхний тунд хамрагдсан бүх хүнийг хоёрдугаар тунд бүрэн хамруулна. Тиймээс утсаар холбогдож мэдээлэл өгтөл гэртээ санаа зовохгүй хүлээж байхыг зөвлөж байна. Мөн албан байгууллагаараа вакцины эхний тунгаа хийлгэсэн бол тухайн байгууллагууд руу мөн холбоо бариад вакцинд хамруулж байгаа. Вакциныг эхний тунд хамрагдсан мэдээллийнх нь дагуу бид вакцинаа хүргүүлж байгаа. Хэрэв тухайн хүний байршилд өөрчлөлт орсон бол сэлгэлт хийх шаардлага гарах тул арга хэмжээ авна. Тиймээс утсаар холбогдохыг хүлээх хэрэгтэй.
АстраЗенека вакцины тун хоорондын зай 56 хоног. Синофарм үйлдвэрийн Вероселл вакцины хувьд хамгийн багадаа 21 хоног байж болно. 21-56 хоногт хоёрдугаар тунг тариулахад дархлаа тогтоно. 56 дахь хоногтоо тариулж чадаагүй бол 12 долоо хоногийн дараа тариулахад дархлаа тогтцод сөргөөр нөлөөлөх зүйл байхгүй гэдэг протокол байгаа. Тиймээс хоног алдлаа гэж сандарч, санаа зовох хэрэггүй.
Спутник V вакцины хувьд ЭМЯ, Засгийн газрын түвшинд оруулж ирээгүй байна. Гэрээ хэлцэл хийж байна. Өмнө нь “Монгол Эм Импэкс” компани 10,000 хүнд хийх вакциныг тусгай зөвшөөрлийн дагуу оруулж ирсэн. “Интермед” эмнэлэгт тариад 9,000 гаруй хүнийг нэг болон хоёрдугаар тунд амжилттай хамруулсан. Хувийн хэвшил оруулж ирээд хувийн эмнэлгээр хийсэн. Засгийн газар энэхүү вакциныг оруулж ирэхээр гэрээ хэлцэл хийж байна.
Түүнчлэн ХӨСҮТ-ийн эмч нар шинжилгээний хариуг хуурамчаар үйлдсэн гэсэн мэдээлэл гарч байгаа. Би 2003 оноос лабораторийн шинжилгээ хийгээд суусан. Энэ чиглэлээр ажилладаг гадаад, дотоодын маш олон хүнтэй хамтарч ажиллаж байхад шинжилгээний хариуг худал гаргая, хүнд буруу мэдээлэл өгье гэдэг хүн бол байхгүй. ХӨСҮТ-ийн ажилчид руу хүмүүс рүү дайрсан. Тэнд олон лаборатори байгаа. Эмч, эмнэлгийн ажилтнууддаа бид итгэж байна. Эерэг хариу гарсан байхад сөрөг, сөрөг гарсан хүний хариуг албаар эерэг гээд засаж суудаг ёс зүйгүй эмч, эмнэлгийн мэргэжилтэн манай салбарт огт байхгүй” гэлээ.
