Л.Оюун-Эрдэнийн Засгийн газрын 100 хоног тохиож байна. Ерөнхий сайд Л.Оюун-Эрдэнэ 100 хоногт хийж хэрэгжүүлсэн ажлаа тайлагнаж, сэтгүүлчдийн асуултад хариулж байна. Ерөнхий сайдын мэдээллээс тоймлон хүргэе.
Хүүхдэд хэзээ вакцин хийх вэ
-Манай Засгийн газар Фпайзер компанитай холбоо тогтоон ажиллаж байгаа бөгөөд додугаар сарын 1-ээс өмнө хүүхдийн вакциныг татан авахаар төлөвлөж байна. Худалдан авалтад ямар нэгэн асуудал гарахгүй. Одоо хийгдэж буй вакцины 80 орчим хувийг бид гаднаас худалдан авсан. Өнөөг хүртэлх худалдан авалтад ямар нэгэн хүндрэл гараагүй.
Төмөр замын талаар
-Нэн тэрүүнд Тавантолгой-Гашуунсухайт, Тавантолгой-Зүүнбаянгийн төмөр замыг төрийн санхүүжилтээр барьж дуусгана. Богдхаан төмөр замыг барина. Энэ бол Улаанбаатар хотын түгжрэлийг бууруулахад өндөр ач холбогдолтой. Харин бусад төслийг заавал төр барих албагүй. Хувийн хэвшлээр барьж, тодорхой хугацаатай эзэмшээд явах боломжийг олгох ёстой. Төмөр зам төслүүд улстөржихгүй явах учиртай.
Засгийн газар тогтвортой ажиллах уу
-МАН 12 жилийн дараа МАХН-тай нийлсэн. Энэ нэгдлийг миний хувьд зөв гэж бодож байгаа. Намууд нэгдэж, дотооддоо ТинкТанк хэлбэрээр хөгжиж, парламентаа илүү хүчтэй болгох ёстой. Ерөнхийлөгчийн сонгуулийн өмнө, хойно байнга Засгийн газрын тогтвортой байдлын асуудал яригддаг. Тиймээс цаашдаа парламентын тогтолцоогоо илүү хүчтэй болгох нь зүйтэй юм. Засгийн газар солигдох бүрт бодлого алдагдаж, том төслүүдийн явц алдагддаг. Өнгөрсөн 30 жилд бүрэн эрхийн хугацаагаа дуусгасан гуравхан Ерөнхий сайд байна. Жасрай, Энхбаяр, Хүрэлсүх нарын Засгийн газар л бүрэн эрхийн хугацаагаа дуусгаж ажилласан. Цаашдаа тогтвортой байдлын асуудал чухал.
Татварын хөнгөлөлт үргэлжлэх үү
-Долдугаар сарын 1-нд төрөөс үзүүлж буй бүх хөнгөлөлт дуусна. Тухайлбал, тог цахилгаан, дулаан, ус, татварын хөнгөлөлт, хүүхдийн мөнгөний нэмэгдлийн хугацаа дуусна. Хэрвээ долугаар сарын 1-гэхэд цар тахлын нөлөө бүрэн арилахгүй бол он дуустал эдгээр хөнгөлөлтийн арга хэмжээг үрэлжлүүлнэ гэж тооцож байна. Вакцинжуулалт үр дүнгээ өгч, эдийн засаг хэвийн горимдоо орж байгаа нь тооцоо судалгаа, статистикийн тоо баримтаар нотлогдвол үе шаттай хөнгөлөлтүүдийг багасгаж, хэвийн горимд шилжинэ. Хамгийн гол нь халдварын тоо, макро эдийн засгийн үзүүлэлтээс ихээхэн хамаарна.
Оюутолгой хэлэлцээр хэрхэн үргэлжлэх вэ
-Оюутолгой бол Монголын ашигтай төслүүдийн нэг. Хамгийн гол татварын асуудлууд Монголын эрх ашигт нийцэхгүй байгаа учраас хэлэлцээр хийх зайлшгүй шаардлага үүссэн. Энэ Засгийн газрын шийдэх том ажлын нэг гэж үзэж байна. Энэ төслийг зогсоох биш, далд уурхайн бүтээн байгуулалт ашиглалтад орж, энэ төслөөс хүртэх Монголчуудын өгөөж илүү хүртээмжтэй байхын төлөө ажиллаж байгааг зөвөөр ойлгох хэрэгтэй.
Хариуцлагагүй ажилласан сайд нарт хариуцлага тооцох уу
Хариуцлага алдсан бол шат шатандаа хариуцлага тооцдог механизм руу Монгол Улс орох ёстой. Жишээ нь, өмнөх Засгийн газрын огцрох асуудал нь ганцхан Шадар сайдын асуудал байсан гэж би боддоггүй. Энэ бол Өргөө амаржих газрын харицлагагүй байдалтай шууд холбоотой. Тиймээс энэ асуудалтай наанатай, цаанатай хандаж явах учиртай гэж би хувьдаа бодож байна. Жишээ нь, цэргийн амь нас эрсдэж байгаа нь эмгэнэлтэй зүйл мөн. Гэхдээ нэг цэрэг эрсдэл гаргасан тохиолдол болгон дээр Батлан хамгаалахын сайд огцорч болохгүй. Ийм улс дэлхий дээр хаана ч байхгүй. Ийм тогтолцоо руу орвол Засгийн газар нь, сайд нар нь хөнгөн, үлээхэд хийсээд уначихдаг зүйлд хэт автаж болохгүй. Тиймээс Ц.Нямдорж дарга, Шадар сайдад өөрсийнх нь алдаатай холбоотой асуудлаар анхааруулж хэлсэн. Харин сайд дарга нарт авлигатай холбоотой ямар нэг асуудал үүсгэвэл би шууд захирамж гаргаж чөлөөлнө.
