ЭМЯ-ны Судалгаа, төлөвлөлтийн хэлтсийн дарга хэлтсийн дарга Б.Бумдэлгэр: Монгол Улсын хэмжээнд өнөөдөр “COVID-19”-ийн халдвараар өвдөөд эдгэрсэн 32 мянга гаруй хүн байна. Эдгээр хүмүүс өөрсдийгөө эдгэрсэн учир дархлаа тогтчихсон. Тиймээс вакцин хийлгэх шаардлагагүй гэж бодож байж болох юм. Энэ асуултад тодорхой хариулт өгөхөд УОК-ын дэргэдэх эрдэмтэн судлаачдын баг “COVID-19”-ийн талаар олон улсад хийгдэж байгаа судалгаа болгонтой танилцаж, шүүж байгаа. Үүний хүрээнд вакцин хийлгэсэн болон өвдөөд эдгэрсэн хүмүүсийн дархлаа ямар хэмжээнд, хэр удаан тогтож байна гэдгийг судалсан.
Улмаар эрдэмтдийн судалгааг үндэслэн “COVID-19”-ийн халдвараар эдгэрсэн хүмүүсийг вакцинд хамруулна гэдэг шийдвэр гарсан. Эрүүл мэндийн сайдын тушаалд “COVID-19-ийн эсрэг вакцинд хамрагдаагүй, коронавируст вирусээр өвчилсөн иргэнд батлагдсан өдрөөс хойш 21 хоногийн дараа вакцины нэгдүгээр тун, вакцин үйлдвэрлэгчийн зааварт заасан хугацаанд хоёрдугаар тунд хамруулна” гэж заасан.
Вакцины нэгдүгээр тундаа хамрагдсаны дараа халдвар авсан иргэдийг шинж тэмдэг илэрсэн эсвэл онош батлагдсанаас хойш 21 хоногийн дараа хоёрдугаар тунд хамруулна. Харин вакцины хоёр тундаа хамрагдсаны дараа халдвар авсан иргэдийг вакцинд хамруулахгүй.
Эрдэмтэд болон эмч нар яагаад ийм шийдэлд хүрсэн бэ гэдгийг гайхаж, төрөл бүрийн байр суурьтай байгаа болов уу. Тэгвэл судалгаанд хамрагдсан ихэнх хүмүүсийн ийлдсэнд “SARS-CoV-2” вирусийн эсрэг саармагжуулагч эсрэгбие буюу “IgG” вирусийн халдвар авсны дараах 14-20 хоногт хамгийн дээд түвшиндээ хүрдэг болохыг тогтоосон. Үүнээс цааш саармагжуулагч эсрэгбие тодорхой хугацаанд хадгалагддаг. Янз бүрийн судалгаанууд дээр саармагжуулагч эсрэг бие 3-6 сар хадгалагдаж байна гэдэг дүгнэлтүүд хийсэн.
Тухайлбал, Аниа Вайнберг гэж эрдэмтний хийсэн судалгаагаар халдвар авснаас хойш 148 дахь өдөр вирусийн эсрэг үүссэн эсрэгбиеийн титр буурч эхэлсэн. Харин Сейя Ямаёши гэж эрдэмтний хийсэн судалгаагаар вирусийн эсрэг үүссэн “Receptor Binding Domain” буюу “Anti-RBD IgG” болон саармагжуулагч эсрэгбиеийн концентрац 160 дахь хоног дээрээ тодорхойлох боломжгүй хэмжээгээр багасаж, байхгүй болж байгаа. Өөрөөр хэлбэл өвдөөд эдгэрсний дараа вирусийн эсрэг үүссэн дархлаа тодорхой хугацааны дараа алга болно гэсэн үг.
Мөн “COVID-19”-ийн халдвараар хүндээр өвчилсөн хүнд вирусийн эсрэг үүссэн эсрэгбиеийн титр өндөр тогтож, удаан хугацаанд хадгалагдана. Энэ байдал хүндэвтэр өвдсөн хүмүүст багасаад шинж тэмдэг багатай, хөнгөн өвчилсөн хүмүүст эсрэгбиеийн титр маш хурдан буурсаар 120 хоногийн дараа тодорхойлох боломжгүй болно гэдэг судалгаа гарсан.
Биологичдын хувьд өвдөөд эдгэрсний дараа үүсэж байгаа дархлаа бол сул дархлаа. Мөн үргэлжлэх хугацаа нь богино гэж хэлж байгаа. Харин эсрэгээрээ вакцин хийлгээд үүсэж байгаа дархлаа удаан хугацаагаар хадгалагдах магадлалтай гэж үзэж байна.
