Номын баярын үеэр номоо худалдан борлуулж байсан хүнд цагдаа нар халдаж байгаа мэт агуулгатай гэрэл зураг өнөөдөр хүмүүсийн анхаарлыг нэлээд татаж байх шиг. Чухам юу болсон талаар уг арга хэмжээний автор, энэ удаа уг баярыг нийслэлийн Засаг даргын тамгын газартай хамтран УИХ-ын дарга Г.Занданшатарын ивээл дор зохион байгуулсан “Номын соёлт ертөнц” төрийн бус байгууллагын тэргүүн Б.Сувдаас тодрууллаа.
-Энэ хэн гэдэг зохиолч вэ?
-Мэдэхгүй. Ийм зохиолч, орчуулагч, хэвлэн нийлэгч танихгүй.
-Зөвшөөрөл хэнээс авсан юм бол?
-Хэнээс ч зөвшөөрөл авалгүй асарт суусан байсан. Номын баярт оролцсон бүх зохиолч, орчуулагч, хэвлэн нийтлэгч вакцины хоёр тун хийлгэсэн гэсэн гэрчилгээг үндэслэж, зөвшөөрөл авч, суудал заалгаж авсан. Энэ хүн хэнтэй ч уулзаагүй.
-Юу болсон юм бол. Цагдаа нар цохиод унагачихсан юм уу?
-Үгүй. Танихгүй хүн суугаад байхаар нь зохион байгуулагчдын зөвлөлийн гишүүн оюутнууд зөвшөөрөл болон вакцин хийлгэсэн гэрчилгээгээ харуулахыг шаардахад “Та нар жаахан хүүхдүүд байж юу гээд байгаа юм бэ” гэж ярьж эхэлснээ сүүлдээ “Хуц” гэж, зохион байгуулагчдыг хэл амаар доромжилж, зодох нь уу гэлтэй айлгаад байхаар нь залуус талбайд аюулгүй байдал сахиулан ажиллаж байсан цагдаа нарт хандсан юм билээ. Цагдаа нар ирэхэд өөдөөс нь сарваганаж байснаа, зургийн аппаараттай хүн хармагцаа шууд газарт хэвтчихсэн гэсэн.
-Нохой шиг юм болох нь.
-Харин тийм ээ, маш эвгүй. Тэгэхэд нь цагдаа нар босгох гэж оролдоход босохгүйн төлөө тэмцсэн. Тэр үеийн зураг нь энэ. Тухайн агшинд хүн газарт хэвтээд, цагдаа нарын өөдөөс тийчилж байсан байна л даа. Учрыг нь олоогүй байж буулгасан зургаа мэдээлэл болгон, ямар ч үндэслэлгүйгээр тайлбарлаж олон нийтэд түгээсэн сайтынханд үүнийгээ залруулахыг шаардаж хандаад байна. Тэд мэдээллээ устгасан гэж хэлсэн. Гэхдээ ердөө цагийн хугацаанд нэгээс нөгөөд дамжин нэлээд таржээ, энэ зураг. Харамсаж байна. Номын баярыг санаатайгаар үймүүлж, бусниулах гэсэн зорилготой хүн шиг санагдсан. Тэгэх ямар шаардлага байсныг ойлгохгүй байна. Олон хүний бүтэн жилийн хүч хөдөлмөрөөр бүтдэг ажил шүү дээ. Ном бүтээлээ дэлгэж, санал болгодог зохиолчид, орчуулагчид, зураачид, хэвлэн нийтлэгчид болон нөгөө талаас уншигч, хэрэглэгч, өөрөөр хэлбэл олон нийтэд ч тустай арга хэмжээ бол номын баяр гэдгийг бүгд мэддэг. Гэтэл бас эсэргүүцэх, үймүүлэх, харлуулах хүсэлтэй хүн байдаг юм байна. Гунигтай. Дөнгөж сая мэдээ авлаа. Цагдаагийн ерөнхий газраас шалгалт хийсэн байна. Тэр хүн согтуу байснаа хэлж, уучлалт гуйжээ. Гэсэн ч ташаа мэдээлэл хүмүүст буруу ойлголт төрүүлсэнд харамсаж байна. Зураг авсан залуу сэтгүүлчээс “Энэ хүн цагдааг шанаадаж байх үеийн зургийг авсан байж таараа, харуул даа” гэхэд “Амжаагүй. Байгаа нь энэ” гэсэн. Ийм л юм боллоо.
-Бас нэг асуулт байна. Номын баярыг амралтын өдөр болгоё, хуульчилъя гэж УИХ-ын зарим гишүүн хууль өргөн барьсан гэх юм. Үнэхээр амралтын өдөр болгохыг зорьж байгаа юм уу?
-Амралтын өдөр биш ээ. Тэмдэглэлт өдөр болгох нь зүйтэй гэж үзсэн. Тэр өдөр амрахгүй. Хуульчдын, Багш нарын, Усны гэх зэрэг мэргэжлийнхний ажил үйлсийг тодотгох зорилготой тэмдэглэлт өдрүүд байдаг шүү дээ. Тийм өдөр болгох нь ном унших соёлыг илүүтэй түгээн дэлгэрүүлэхэд тустай гэж үздэг тул хууль санаачлагчидтай хамтран ажиллаж байгаа юм. Үүнд буруу байна уу, та хэл дээ.
