Замын-Үүд дэх тээвэрлэлт, ачааны үнэ, зохион байгуулалтын асуудлаар Засгийн газраас томилсон тусгай төлөөлөгч, төрийн байгууллагын ажил хариуцсан хүмүүс мэдээлэл хийлээ.
Замын-Үүд дэх Гаалийн газрын дарга Б.Отгонсүх: Замын-Үүдийн гаалийн газар иргэдэд 12 хяналтын бүсээр өглөөний найман цагаас оройны 22:00 үйлчилгээ үзүүлэн ажиллаж байна.
Хяналт шалгалт бүрдүүлэлтийг цаг тухайд нь хийж, ачаа барааг тухайн өдөртөө эздэд нь олгох үйл ажиллагааг шуурхай зохион байгуулж байна. Мөн 12 хяналтын бүсээр үйлчлүүлж байгаа иргэдийн ариутгал халдваргүйжилтэд анхаарч байгаа юм. Өмнөх хорь гаруй хоногийн хугацаанд импортын бараа бүтээгдэхүүн 50-60 хувь өссөн үзүүлэлттэй, экспорт 10 орчим хувиар ачаа барааны эргэлт нэмэгдсэн гэх үзүүлэлт гарлаа. Энэ хорь гаруй хоногийн хугацаанд 747 вагон импортоор орж ирлээ. Харин экспортоор 2656 вагон орж ирсэн байна.
Анх 50000 тонн орчим ачаа Эрээний гаальд бөөгнөрсөн гэх мэдээллийг хилийн боомтын зүгээс мэдээлсэн. Үүнд бид голчилж анхаарлаа хандуулсан бөгөөд өнөөдрийн байдлаар 20000 тонн орчим ачаа хилийн урд боомтод үлдсэн байна.Тодруулбал, энэ хорь хоногийн хугацаанд 30000 тонн ачаа барааг бид оруулж эздэд нь хүлээлгэж өгсөн гэж ойлгож болно. Үлдсэн ачааг наймдугаар сард багтаан авч, үйл ажиллагаа хэвийн горимд шилжинэ хэмээн тооцож байна.
Мөн Эрээнд гаалийн гадна болон дотор талд 2000 орчим машин байсан. Эдгээр автомашинд хяналт шалгалт хийж, эздэд нь хүлээлгэж өгсөн байгаа.
Боомтын зөвлөлөөс Засгийн газрын чиглэлийн дагуу өчигдөр тээврийн зардлыг гурав дахин бууруулах шийдвэр гаргасан. Ингэснээр иргэдэд хүрэх ачаа тээврийн зардал буурч, мөн ачаа барааны үнэ буурах үүднээс энэ асуудлыг авч хэлэлцэн шийдвэрлэсэн.
Замын-Үүд дэх хилийн мэргэжлийн хяналтын газрын дарга Л.Эрдэнэчулуун: Замын-Үүд боомтын зөвлөлөөс долдугаар сарын 10-ны өдрөөс өнөөдрийг хүртэл хэд хэдэн арга хэмжээг авч ажиллалаа. Нэгд, бид экспорт импортын ариутгалын байгууламжийг байгууллаа. Үүнийг байгуулснаар улсын хилээр нэвтрэх тээврийн хэрэгслийг олон улсын стандартын дагуу бүрэн ариутгах боломжийг бүрдүүлсэн. Тус ариутгалын байгууламж нь өөрөө хоёр талдаа 10 тонн бодисын нөөц савтай. Тус тонн бодисын саваар 1000 автомашин халдваргүйжүүлэх боломжтой. Хоёрт, хилийн хяналтын цэгийг сайжрууллаа. Хяналтын цэгт улаан, шар , ногоон бүсийн дэглэмийг тогтоосон. Мөн хяналтын байруудын байрлалыг зөв урсгалд оруулж байршуулсан юм.
Хяналтын цэгт цар тахалтай холбогдуулан халдвар хамгааллын дэглэмийг сайжруулах үүднээс улаан бүсэд эрүүл мэндийн хяналтын термо камерыг байрлуулж, тусгайлан ажиглах байр байгуулан халдваргүйжилтийн бүртгэлийн цэгийг ажиллуулж байна.
Хяналт шалгалтыг 12 бүсэд явуулж буй. Өнгөрсөн хорь хоногийн хугацаанд импортын 10836 тээврийн хэрэгсэлд хяналт тавилаа. Импортын чиглэлээр орж ирж байгаа бараа бүтээгдэхүүнд шалгалт хийхэд зөрчил дутагдал гарч байна. Тухайлбал, 24 аж ахуйн нэгжид хяналт шалгалт хийхэд 85167 бараа бүтээгдэхүүнд зөрчлийн тухай хуулиар зохих арга хэмжээг авлаа. Мөн хаяг шошго тодорхойгүй, зөрчилтэй гэж үзсэн 16 тонн хатаасан үзмийг улсын орлогод оруулсан. Мөн “Дийлэгч тэнгэр” компанийн бичиг баримтын зөрчилтэй транзит тээврийн 16 чингэлэг, 392 тонн рапс үрийг буцаасан.
Түүнчлэн, устгалын ажил зохион байгуулсан юм. Тодруулбал, гарал үүсэл тодорхойгүй буюу хаяг шошгогүй, стандартын бус, шинжилгээний дүнгээр эерэг гарсан 12.6 тонн шар будааг устгалаа. Мөн бичиг баримтын зөрчилтэй, стандартын шаардлага хангаагүй цагаан будаа, нэг удаагийн амны хаалт, бээлийг хураан устгалд оруулахаар сумын зөвлөлд шилжүүлсэн.
Экспортын хяналтын хувьд нийт 85 аж ахуйн нэгжийн 131 машин, 5283 вагонд хяналт тавилаа. Ингэхэд 382 ширхэг мал амьтны гаралтай бүтээгдэхүүн болон түүхий эдэд зөрчил илэрч арга хэмжээ авлаа” гэлээ.
