Парламентын сэтгүүлчид мэдээлэл дамжуулах эрхийнхээ төлөө төрийн өндөрлөгүүдэд шаардлага хүргүүллээ.
Манай улсад КОВИД-19 бүртгэгдсэнээс хойш халдвар хамгааллын дэглэм сахиулах үүднээс иргэдийн хөдөлгөөнийг хязгаарлах, хөл хорио тогтоох зэрэг арга хэмжээг авч хэрэгжүүлсээр ирсэн. Гэвч энэ нь төдийлөн үр дүнтэй арга биш болох нь батлагдаж, энгийн амьдарлын горимд шилжиж эхлээд байна.
КОВИД-19-ийн халдвараас урьдчилан сэргийлэх нэрийн дор Төрийн ордон руу нэвтрэх сэтгүүлчдийн хөдөлгөөнийг хорьж, эрх баригчид зөвхөн нэг цэгээс мэдээ, мэдээлэл өгч байгаа юм. Энэ хугацаанд УИХ-ын үйл ажиллагаатай холбоотой мэдээ мэдээллийг сэтгүүлчид сурвалжлах бус парламентын зүгээс гаргасан мэдээллийн хүрээнд л дамжуулж байгаа гэхэд хилсдэхгүй. Өөрөөр хэлбэл, нийгэмд асуулт бий болгосон үйл явдал, улстөрчийн талаар ямар нэгэн мэдээлэл бэлтгэх боломжгүй болоод байгаа билээ.
Өнгөрсөн хугацаанд сэтгүүлч, хэвлэл мэдээллийн байгууллагууд мэдээлэл олж авах эрх хязгаарлагдаж, үүгээр дамжуулан иргэдийн мэдэх эрх зөрчигдөж байгаад санаа зовнин удаа дараа энэ асуудлыг хөндөж байсан ч Монгол Улсын Ерөнхийлөгчийн Тамгын газар, УИХ-ын Тамгын газар, ЗГХЭГ-ын зүгээс “Төрийн ордноос мэдээ, мэдээлэл бэлтгэх журмыг шинэчилж байгаа” гэдэг хариу өгсөөр ирсэн. Тиймээс сэтгүүлчид нэгдэн “Парламентын сэтгүүлчдийн Түр хороо” байгуулан, мэдээлэл дамжуулах эрхээ хамгаалж, холбогдох хүмүүст шаардлага хүргүүллээ.
“Парламентын сэтгүүлчдийн Түр хороо”-ноос Монгол Улсын Ерөнхийлөгчийн Тамгын газар, УИХ-ын Тамгын газар, ЗГХЭГ-т хандан тэдний боловсруулж буй гэх “Төрийн ордноос мэдээ, мэдээлэл бэлтгэх журам”-д мэдээлэл олж авах боломжоор хангахтай холбоотой заалтуудыг тусгуулахаар шаардав.
Харин Засгийн газрын Хэвлэл мэдээлэлтэй харилцах газрын дарга Т.Ганзул, УИХ-ын Тамгын газрын Хэвлэл мэдээлэл олон нийттэй харилцах хэлтсийн дарга С.Батбаатар нар сэтгүүлчдийн шаардлагыг хүлээн авч маргаашаас Төрийн ордноос мэдээ, мэдээлэл бэлтгэх түр журамд өөрчлөлт оруулах хамтарсан ажлын хэсэг байгуулна гэдгийг хэлсэн юм.
Сэтгүүлчдийн байр суурь
UBN сайтын эрхлэгч Г.Лхагвадорж: Бид эхэндээ цар тахлын нөхцөл байдлыг ойлгоод Төрийн ордноос тогтоосон дүрэм, журмын хүрээнд ажиллаж ирсэн. Гэтэл одоо дэлхий нийт цар тахалтай зэрэгцэн амьдраад эхэлсэн. Мөн манай улсад бүх үйл ажиллагаа нээчихээд байхад Төрийн ордонд сэтгүүлчдийн ажиллах эрхийг нээхгүй байгаа нь сэтгүүлчид, хэвлэл мэдээллийг хэрэгсэл зөвхөн дамжуулах хэрэгсэл л болж хувирлаа.
NTV телевизийн сэтгүүлч Ч.Лодойсамбуу: УИХ-ын гишүүд дарга биш ээ. Дөрвөн жилд нэг удаа ажилд оръё гээд мөрийн хөтөлбөрөө бариад ирдэг. Иргэд өөрсдөө ажилд авдаг. Ажилд авсан хүмүүс нь ажлаа хийж байна уу гэдгийг мэдэх эрхтэй. Хоёр жил үүнийг мэдүүлэхгүй явлаа. Одоо бүх зүйл нээлттэй болсон учраас сэтгүүлчдийг ч чөлөөтэй ажиллуулмаар байна. Цар тахал нэрээр өөрсдөө хүсвэл гарч ирээд ярьдаг болсон. Ярилцлага өгөх, эсэх нь тухайн хүний эрх. Гэхдээ гишүүд хувь хүн биш. Олон мянган хүний санал авч гарч ирсэн учраас олон нийтийн анхаарал хандуулж байгаа, хүсч байгаа мэдээллийг өгөх үүрэгтэй.
Zarig.mn сайтын ерөнхий эрхлэгч Н.Өнөрцэцэг: Өнөөдөр парламентын сэтгүүлчид нэгдээд УИХ-ын тамгын газар, Ерөнхийлөгчийн тамгын газар, ЗГХЭГ-т шаардлага хүргүүлж байгаа. Төрийн ордноос мэдээ, мэдээлэл бэлтгэх журмыг эргэн харах хүсэлт тавьж байна. Биднийг ажиллах нөхцөлөөр хангахгүй хоёр жил боллоо.Ордонд ажиллах сэтгүүлч нар ариун цэврийн өрөө ороход хүртэл хамгаалалтын ажилтан дагаж явдаг. Сөрөг хүчин нь тараад явчихсан, эрх баригч нам хэт олонх байгаа энэ үед хэвлэл л сөрөг хүчний үүргийг гүйцэтгэнэ. Гэтэл сэтгүүлчдийн нүд чихийг хааж, ажиллах нөхцөл боломжийг хязгаарлаж байна. Бид дарга нарын захиалсан дууг дуулдаг утсан хүүхэлдэй биш. Төрийн ордонд бид чөлөөтэй нэвтэрч гишүүд, сайд нараас асуулт асуумаар байна. Иргэдийн мэдэх эрхийг хангамаар байна.
TV5 телевизийн сэтгүүлч Ч.Доржбат:Сэтгүүлчид мэдэх эрхээ олж авахаар тэмцэж байгаад манай редакц дэмжиж оролцож байна. Ганцхан УИХ ч хаалттай болсон юм биш. Яамд, агентлагууд ч хаалттай болсон. Сэтгүүлч очоод мэдээлэл авъя гэхээр оруулахгүй, гадаа үүдэнд нь дуудаж уулздаг болсон. Төрийн бүх шатанд ийм болсон. УИХ-ын Тамгын газарт гол учир бий гэж бодож байна. Маш их хаалттай байдаг.
