Засгийн газраас боловсруулж 2021 оны есдүгээр сарын 30-ны өдөр УИХ-д өргөн мэдүүлсэн Монгол Улсын 2022 оны төсвийн тухай хуулийн төсөлд Засгийн газрын бүтцэд Эдийн засаг, хөгжлийн яам, Цахим хөгжил, харилцаа холбооны яамыг байгуулан ажиллуулахад шаардагдах санхүүжилтийг тусгажээ.
Иймд Монгол Улсын Засгийн газрын бүтцэд Эдийн засаг, хөгжлийн яам, Цахим хөгжил, харилцаа холбооны яамыг, Засгийн газрын бүрэлдэхүүнд эдийн засаг, хөгжлийн асуудал эрхэлсэн Засгийн газрын гишүүн, цахим хөгжил, харилцаа холбооны асуудал эрхэлсэн Засгийн газрын гишүүнийг тус тус нэмэхээр хуулийн төслийг боловсруулсан хэлэлцэж байна.
Хэлэлцэж буй асуудалтай холбогдуулан УИХ-ын гишүүд асуудь асууж байна.
ЗГХЭГ-ын дарга Ц.Нямдорж: Хоёр яамны төсвийн тухайд 2020 оны төсвийн төсөлд Эдийн засаг, хөгжлийн яам 4.3 тэрбум төгрөг, Цахим хөгжил, харилцаа холбооны яам 1.8 тэрбум төгрөг төсөвлөсөн байна. Одоогийн байдлаар тус хоёр агентлаг 30-40 хүнтэй ажиллаж буй. Төсөвт тооцож оруулснаар шинэ хоёр яаманд 80, 80 хүний орон тоо гаргах санал яригдаж байна. Гэхдээ явцын дунд өөрчлөгдөх байх.
УИХ-ын гишүүн Н.Алтанхуяг: Яам байгуулчихаар холдоод явчихдаг. Хөгжлийн яам, Цахим яам байгуулж байснаас Хөгжлийн асуудал хариуцсан шадар сайд, Мэдээллийн технологийн асуудал хариуцсан шадар сайд бий болгох хэрэгтэй. Монгол Улсын хөгжлийн асуудлыг гурван шадар сайд нь Ерөнхий сайдтайгаа хамтран аваад явдаг болмоор байна.
УИХ-ын гишүүн Г.Тэмүүлэн: Хөгжлийн яаманд Сангийн яамтай эрх мэдлийг нь давхардуулахгүй байх өгөх хэрэгтэй. Бүх яам Эдийн засгийн хөгжлийн яаманд зангилагддаг байхгүй бол энэ яам эдийн засгийн хувьд үр дүнгүй болно. Яамдуудын салбар хоорондын бодлогыг зангидахад зангараг дутагдах юм шиг санагдаж байна. Эдийн засгийн хөгжлийн яам хүчтэй яам байх хэрэгтэй.
УИХ-ын гишүүн О.Цогтгэрэл: Хоёр яам дөрвөн агентлагийн зардал 40 тэрбум төгрөг. Хоёр яам асар хэрэгцээтэй гэж байна. Гэхдээ үүний 40 тэрбум төгрөг 2022 оны төсөвтэй нийлээд ДНБ-д сүүлийн таван жилд 10 их наядаар нэмэгдсэн. Хоёр яам чухам яагаад хэрэгтэй вэ гэдгийг тодруулмаар байна. Яам болгох гэж байгаа хоёр агентлаг Ерөнхий сайдын шууд удирдлага дор байдаг агентлагууд шүү дээ. Хэрвээ хоёр яам нэмэгдэж байгаа бол яамдыг эрэмбэлээд хоёр яамын хасмаар байна.
УИХ-ын гишүүн Т.Аюурсайхан: Асуудлыг дутуу боловсруулсан байна. Нэрнээсээ авахуулаад. Улс, салбар хоорондын болон бүс орон нутгийн хэмжээнд нэгдсэн бодлогоор хангах асуудлыг Шадар сайд юм уу ЗХГЭГ-ын даргын аль нэг нь хийгээд явах боломжтой. Цөөн хэдэн чиг үүргийн төлөө яам байгуулах хэрэггүй. Хэнийг сайдаар тавих вэ. Ажлаа хийж чадахгүй хүмүүс их байна. Бичиг цаасны ажил хийж чадахгүй, зохион байгуулалтгүй хүмүүс их байна. Бас нэг нөхөр ирээд ажлаа хийж чадахгүй бол яах вэ. Үүний төлөө яам байгуулах хэрэг байна уу. Эхлээд яамаа байгуулаад дараа нь ранкийг нь шийднэ гэж хариуцлагагүй түүхий төсөл оруулж ирж байна. Яам байгуулснаар эдийн засаг хөгжих гэж байгаа юм шиг харагдах байдалдаа анхаараад байна. Гол нь агуулгадаа анхаарах. Чиг үүрэг дутмаг түүхий байдлаар ажилдаа хандмааргүй байна.
