Засгийн газрын хуралдаанаар ТӨХК-уудад хийх шинэчлэлийн бодлогыг хэлэлцжээ.
ТӨХК-уудад гурван ангиллаар бүтцийн өөрчлөлт хийхээр болсон. Нэгд, стратегийн хувьд 100 хувь төрийн өмчит байх шаардлагатай компаниуд. Хоёрт, хувьцаат компани болгож засаглал, нийгмийн өгөөжийг сайжруулах компаниуд. Гуравт, нийгэм, эдийн засгийн үр өгөөжгүй, цаашид төрийн өмчит байх шаардлагагүй компаниуд. Тэгвэл өнөөдрийн хуралдаанаас төрийн өмчид 100 хувь хамаарах компаниудыг зарлаж, тогтвортой бодлогоор дэмжих шийдвэр гарсан байна. Сангийн сайд Б.Жавхлан төрийн өмчид 100 хувь хамаарах компаниудыг зарлалаа. Үүнд,
-Эрдэнэт Үйлдвэр
-Монголросцветмет
-Эрдэнэс Оюу толгой
-Улаанбаатар дулааны сүлжээ
-Цахилгаан дамжуулах үндэсний сүлжээ
-Дархан дулааны сүлжээ
-Диспетчерийн үндэсний төв
-Монгол фүүд
-Газрын тос боловсруулах үйлдвэр
-Хөшигийн хөндийн нисэх онгоцны буудал
-Дулааны II, III, IV цахилгаан станц
-Дарханы дулааны цахилгаан станц
-Эрдэнэтийн дулааны цахилгаан станц
-Даланзадгадын дулааны цахилгаан станц
-Багануурын дулааны цахилгаан станц
-Налайхын дулааны цахилгаан станц
-Хөвсгөлийн дулааны цахилгаан станц
-Ховдын дулааны цахилгаан станц
-Шарын голын дулааны цахилгаан станц
-Улаангомын II дулааны цахилгаан станц
-Амгалан дулааны цахилгаан станц
-Эгийн голын усан цахилгаан станц
-Таван толгой түлш
-Авто тээврийн үндэсний төв
-Дипломат байгууллагын үйлчилгээ эрхлэх газар
-Барилгын хөгжлийн төв
-Улаанбаатар төмөр зам
-Монголын төмөр зам
-Төрийн орон сууцны корпорац
-Хөгжлийн банк
-Эрчим хүчний дамжуулах дэд станц эзэмшиж буй төрийн болон төрийн өмчийн оролцоотой хуулийн этгээдийн зөвхөн тухайн үйл ажиллагааг эрхлэх хуулийн этгээдүүд
-Орон нутгийн АЗЗА компаниуд
-Дулааны болох цахилгаан түгээх станцууд багтаж байна. Удахгүй Засгийн газрын тогтоол эцэслэн гарах аж.
Сангийн сайд хэлэхдээ “Энэ компаниуд стратегийн хувьд улс 100 хувь хяналтдаа байлгах шаардлагатай. Эрдэнэт, Эрдэнэс таван толгой хоёр төрийн өмчийн компаниудын 80 гаруй хувийн ашгийг хийж байгаа. Энд дурдагдсан компаниудын дийлэнх нь алдагдалтай ажилладаг. Гэсэн ч тарифын зохицуулалтыг төрөөс хийдэг. Тиймээс улсад байх зайлшгүй шаардлагатай гэж ийм шийдвэр гаргасан. Хоёр болон гуравдугаар ангиллын компаниудад хийх бүтцийг өөрчлөлтийн талаарх шийдвэрийг энэ ондоо багтаан гаргана” гэлээ.
