Баянзүрх дүүргийн Нарт хотхоны иргэд улсын төсөвт хөрөнгийг нь тусгасан замын бүтээн байгуулалтыг эхлүүлэх хүсэлтэй байгаа талаар өнөөдөр хэвлэлийн хурал хийлээ.
Тодруулбал, тус хотхоны орчимд авто зам тавихаар улсаас жил бүр хөрөнгө суулгадаг ч ямар ч ажил хийгддэггүйгээс болж усанд автдаг аж.
“Улсын төсвөөр баригдах замыг тавихын тулд доогуур нь явсан ус сувгийн шугамыг шинэчлэх шаардлагатай”
Оршин суугчдын төлөөлөл “Нарантуул болон Өгөөмөр захыг дайран өнгөрдөг замын асуудал шийдэгдэхгүй удаж байна. Нарт хотхон орчимд зам тавих хөрөнгө улсын төсөвт жил бүр тусгагддаг ч 1959 онд тавигдсан магистраль буюу ус, дулаан дамжуулах шугамын засвар үйлчилгээний мөнгө орж ирээгүй шалтгаанаар ажил хийгддэггүй.
Энэ жил гэхэд л зам тавихаар 2.6 тэрбум төгрөг улсын төсөвт суусан ч тухайн усны шугамыг шинэчлэх хөрөнгө төсөвт суугаагүй тул замын ажил хийгдэхгүй байгаа юм.
“Тухайн 1959 оны магистраль шугам нь нийслэл хотын иргэдийн ундны усны 40-60 хувийг хангадаг бөгөөд хэрэв гэмтэж, эвдэрвэл хотын оршин суугчид 10 хоног усгүй болно. Цахилгаан станц 10-14 хоног ажиллах боломжгүй болно” гэх мэдэгдлийг Ус сувгийн удирдах газраас бидэнд өгсөн.
Энэ асуудлыг яаралтай анхааран засаж, замын бүтээн байгуулалтыг хийхгүй бол Нарт хотхоны иргэд хавар, намрын улиралд тоосжилтод, зун нь шалбааг дунд амьдарч байна.
Зун бороо орохоор тэр хавь үерлэж, автомашины хамар дээгүүр давсан ус хурж, оршин суугчид хотхон руугаа орох боломжгүй болдог. Мөн ийм уснаас болж гарааш болон хотхоны зүүн хойд талд байрлах цахилгаан станц руу хүртэл ус орж, улмаар хотхон орчмын усыг 24 цагаар соруулдаг. Үүнээс болж хүн амиа алдвал хэн хариуцах вэ.
Бид хотынхоо төвөөс гуравхан километр зайд байж тоосжилт дунд амьдарч байж, тоосжилтоос болж үр хүүхдүүд минь харшилтай, ахмадууд хүртэл астматай болж байна. Бид Үндсэн хуульд заасан эрүүл аюулгүй амьдрах эрхээ эдэлж чадахгүй байгаа тул өнөөдөр аргаа бараад хэвлэлд хандаж байгаа юм.
Манай хотхон дахин төлөвлөлтөд хамрагдсан орон сууц бөгөөд бид 2018 оноос хойш энэ замын асуудлыг хөөцөлдсөөр ямар ч огт ахиц гарсангүй өдий хүрлээ.
Мөн зам тавихаар тендерт шалгарсан компани нь тэнд 1959 онд тавигдсан магистраль шугам байдгийг ч мэдэхгүй зураг төслөө бариад явж байдаг. Уг нь тендер зарлахдаа тэнд хуучин ус сувгийн шугам болон цахилгааны шугам байдгийг мэдэгдэж, цогцоор нь шийдэх ёстой” хэмээн ярилаа.
“Дахин төлөвлөж байгаа бол ядаж замын асуудлыг нь маш сайн шийдэх ёстой”
Оршин суугчийн төлөөлөл “1959 оны магистраль шугамыг засах л хөрөнгө байхгүй шалтгаанаар тэр замыг өдий хүртэл тавихгүй байгаад харамсаж байна. Бүхэл бүтэн төрт улс байж улсынхаа томоохон худалдааны захуудыг нь холбосон төв замаа тавьж чадахгүй байна.
Манай хотхоны оршин суугчид зун бороо орсон үед гэр рүүгээ орох ямар ч боломжгүй, хүүхдүүд нь гадаа тоглох ч ойлголт алга. Жил бүр төсөвт 2.6 тэрбум төгрөг суулгадаг ч асуудлыг шийдэлгүй төсвөө эргүүлж татаад байдгийг гайхдаг.
Тухайн хэсгийн магистраль шугамыг засахад нийт 6 тэрбум төгрөг шаардлагатай гэсэн. Гэтэл замын тавих тендерийг 2.6 тэрбумаар зарлаад нэг компанид хариуцуулаад орхидог. Гэтэл тэр компани зам тавихын тулд эхлээд доогуур нь явсан магистраль шугамыг засах шаардлагатай болно. Ингээд замын төсөл гацдаг.
Уг нь төрөөс гэр хороолол, барилга байгууламжийг дахин төлөвлөж байгаа бол ядаж замын асуудлыг нь маш сайн шийдэх ёстой. Тэгж чадахгүй бол үнэхээр гэр хорооллыг дахин төлөвлөх хэрэг байгаа юу? Бүр дахин төлөвлөсөн барилга гэж хэлэхээс ч ичмээр юм.
Баянзүрх бол нийслэлийн хамгийн олон хүн амтай дүүрэг. Бид гэр рүүгээ очих гэж 2-3 цаг түгжрээд, дараа нь хотхон руугаа орох гэж шалбааг туулж байна.
Мөн тухайн шугамд байнга бага зэрэг гэмтэл гарлаа гэж байнга ухдаг мөртлөө нэг мөсөн засдаггүй. Гаргаад засъя гэхээр нийслэл хот 10-14 хоног халуун, хүйтэн усгүй болно гэдэг. Яагаад төр засаг ийм асуудлаа шийдэхгүй өдий хүртэл явж байгааг гайхаж байна” гэлээ.
