УИХ-ын чуулганы өнөөдрийн хуралдаанаар Цөмийн энергийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд /Засгийн газар 2024.10.25-ны өдөр өргөн мэдүүлсэн, анхны хэлэлцүүлэг/-ийг хэлэлцэж байна.
“ЖИЛД 215 МЯНГАН ТОНН ХҮХРИЙН ХҮЧЛИЙГ ГАЗАР ЭЭЖИЙН ХЭВЛИЙ РҮҮ ШАХНА”
УИХ-ын гишүүн, Аж үйлдвэржилтийн бодлогын байнгын хорооны дарга С.Ганбаатар:
– Ураны олборлолтыг АМНАТ-ыг 34 хувийг бууруулж гаднын компанид өгснөөрөө шар нунтгаа худалдаж авахын тулд гуйдаг байдал руу орох вий.
Хуулиас гэрээ рүү шилжиж байна. Арслан хонь хоёр хэлэлцээр хийхэд маргааш нь хонь мах болно гэдэг үг байдаг шүү. УИХ-ын хуульд 34 хувийг үнэ төлбөргүйгээр шууд эзэмшинэ гэдэг, ОТ-ын өрөөс огт өөр. Ийм заалтыг өөрчлөөд 0-9 хувь буюу өсөн нэмэгдэх рояалти руу оруулж байгаа. Өөрөөр хэлбэл Цөмийн энергийн комиссын хэдэн хүмүүс эрх мэдлээ УИХ-д өгч байна гэсэн үг. Эргэхээсээ өнгөрсөн байх. Протоколд оруулах ёстой гэж үзсэн учраас
үүнийг хэлж байна.
Манайд ураны нөөцөөрөө дэлхийд 11-т ордог ч цөмийн энерги үйлдвэрлэлтээсээ татгалзаж байна гэсэн үг. Франц өнөөдөр Нигерээс хөөгдсөн, Канадад дөрвөн орд нь дуусаж байгаа, юу ч хүлээж авахад бэлэн байгаа. Хэлэлцээр дуусахад та бид ямар ч эрх мэдэлгүй болно гэдгийг ойлгох хэрэгтэй.
Ураныг аюулгүй гэж пиардсаар байгаад аюулгүй мэт болгож байх шиг байна. Энэ нь цацраг идэвхт ашигт малтмал юм байгаа юм шүү дээ. Жилд 215 мянган тонн хүхрийн хүчлийг газар ээжийн хэвлий рүү шахна. Энэ нь өдөрт 15 вагоны шахаж байж уран олборлоно гэсэн үг. Хүхрийн хүчил нийт зардлын 20 хувь буюу жилд 50 сая ам.доллар, нийт 1,2 тэрбум ам.доллар гэж тооцоолжээ. Дууссаных нь дараа хүхрийн хүчлийг нь хаяна, байгаль өөрөө саармагжуулна гэжээ. Энэ бол дээрэлхэлт. Манай байгаль орчныхон надад худлаа ярьсан шүү. Жилд 750 тонн ноцтой хог хаягдал гарна, үүнийг хэрхэх талаар нэг ч эрх зүйн орчин бүрдүүлээгүй. Гишүүд минь ээ, бүгд тэнд очиж амьдрах гэж байгаа юм шиг хандах хэрэгтэй.
