УИХ-ын зарим гишүүд өнөөдөр С.Зоригийн хэрэгтэй холбоотой асуудлаар Төрийн ордны “А” танхимд хаалттай хуралдлаа. Учир нь С.Зоригийн хэргийг мөрдөн байцаах ажлын хэсгийн ахлагч, Улсын ерөнхий прокурорын орлогч Г.Эрдэнэбат өчигдөр “Цензургүй яриа” нэвтрүүлэгт оролцох үеэр С.Зоригийн хэрэгтэй холбогдох зарим баримтыг дэлгэж, Хууль зүй, дотоод хэргийн сайд Ц.Нямдоржийг С.Зориг агсныг хөнөөсөн хавтаст хэрэгтэй хууль бусаар танилцсан гэх утгатай зүйл ярьсан юм. Үүнээс үүдэж Хууль зүйн байнгын хорооны өнөөдрийн хурал дээр С.Зоригийн хэрэгтэй холбоотой асуудал хөндөгдөж, ихэнх гишүүд мэдээлэл сонсмоор байна гэсэн юм.
Тухайлбал, УИХ-ын гишүүн Л.Болд “С.Зоригийн хэрэгтэй холбоотойгоор иргэдийн байр суурийг сонссоны төлөө гишүүдэд эрүү үүсгэж байна. Одоо бас олон улсын байгууллагын тавьсан дүгнэлт дээр дүн шинжилгээ хийх ажлын хэсэгт багтсаны төлөө дахин нэг хэрэг үүсгэж байна. Энэ Хүний эрхийн байгууллага юу хийж байна вэ. Өнөөдөр Олон улсын парламентын холбоо чинь Монгол УИХ-ыг ТББ гэж зарласан гэж байна. УИХ-ын гишүүн бол ямар ч эрх мэдэл, үүрэг хариуцлагагүй, сэтгүүлчээс доогуур орох албан тушаалтан гэдгийг Монголын ард түмэнд зарлаж байна. Б.Ренчин гуайг алахдаа 70 насанд даруулга хэрэгтэй гэж хар пиар хийж байсан. Үүнтэй ижил ажиллагааг олон үзлээ. Үнэн мөнийг нь сонсох үүрэг бидэнд бий. Бид С.Зоригийн хэрэгтэй холбоотой ажлын хэсгийн дүгнэлтийг сонсмоор байна” гэв.
Мөн хэлэлцэж байгаа асуудалтай холбогдуулан ХЗДХ-ийн сайд Ц.Нямдорж: “С.Зориг агсны хэргийг шийдвэрлэсэн шүүх хурлын шийдвэртэй холбоотой асуудлаар мэдээлэл солилцох, нөхцөл байдалтай танилцах, цаашдын үйл ажиллагаагаа төлөвлөх уулзалтыг Байнгын хорооны түвшинд хийх шаардлага үүсээд байна. “Нууц” гээд парламентад үзүүлдэггүй материалуудыг нэг сэтгүүлчээр дамжуулан хэвлэл мэдээллийн хэрэгслээр гаргаж тавьж байна. УИХ-ын гишүүний бүрэн эрхэд халдаж байна, заналхийлж байна. Дээрх хэргийн өмгөөлөгч нь үг дуугарч чаддаггүй, яллагч нь “нууц” гээд байсан материалуудаа хэвлэлийн байгууллагад дэлгээд нэг талын тайлбар хийгээд сууж байна. Үндсэн хуулийн шүүхийн тогтолцоо нурж байгаагийн илрэл гэж би хувьдаа харж байна. Хууль хяналтын байгууллагатай УИХ-ыг төлөөлөн харилцдаг ганц Байнгын хороо нь Хуульзүй. Хүний эрх, эрх чөлөө, түүний баталгаатай холбоотой асуудал ноцтой хөндөгдөөд байгаа энэ нөхцөлд Хууль зүйн байнгын хороо байдлыг тодруулж, байр сууриа нэгтгэн, төлөвлөгөө гарган ажиллах нь зүйтэй гэдэг саналыг УИХ-ын гишүүний хувиар төдийгүй Засгийн газрын гишүүн, Хууль зүй, дотоод хэргийн сайдын хувиар хэлье” гэлээ. Байнгын хорооны гишүүд эхний удаад уг асуудлаар УИХ-ын гишүүдийн санал солилцох уулзалтыг зохион байгуулах нь зүйтэй гэж үзэв.
