Шэньжэнь /Shengzhen/ хот анх байгуулагдах үедээ буюу 35 жилийн өмнө загасчдын тосгон байлаа. 30 жилийн өмнө ч энд их дээд сургууль, шинжлэх ухаан судалгааны байгууллага бараг байхгүй байсан бол өнөөдөр 20 сая хүн амтай мега-метрополис хот болон томорчээ.
2017 онд судалгаанд зориулсан санхүүжилт GDP-ийн 4 хувиас илүү гарч, сүүлийн хэдэн жилүүдэд венч хөрөнгө оруулалтын сангуудаас санхүүжилт авсан тоогоороо Хятадын стартап компаниуд зөвхөн АНУ-ын дараа бичигдэж байна. Ийнхүү дэлхийд тэргүүлж буй БНСУ, Израйлийн хэмжээнд хүрээд байгаа юм. Үндэсний хэмжээний дэвшилтэт технологийн 10 мянга гаруй аж ахуйн нэгжтэй, дэвшилтэт технологийн үйлдвэрлэлийн GDP-д эзлэх хэмжээ 30 хувиас илүү гарсан байна.
АНУ-ын Калифорни мужид байрлах “Цахиурын хөндий” хэмээх газар нь шинэ санаа, шинэ технологи, шинэ бүтээгдэхүүн гээд инновацийг төрүүлж, ирээдүйг бүтээж байдаг газар. Бидний сайн мэдэх Microsoft, Intel, Google, Yahoo, Facebook бүгд л цахиурын хөндийгөөс гаралтай технологийн компаниуд. АНУ-ын мэдлэгийн эдийн засгийн үүсэл хөгжил яг л энэ газраас эхэлсэн түүхтэй байдаг. Улс орон бүр өөрийн гэсэн цахиурын хөндийтэй болох зорилт тавин ажиллаж байна. Япон, Хятад, Канад, ӨАБНУ, Австрали, Англи, Шинэ Зеланд, ОХУ гээд томоохон улс орнууд өөрсдийн цахиурын хөндийг бий болгох үүднээс стартап компаниудад хамгийн ээлтэй орчин нөхцлийг бүрдүүлж тэднийг татах гэж ихэд хичээх болжээ.
Стартап үндэстэн болохоор хүчтэй зүтгэж буй дараагийн улс бол бидний урд хөрш БНХАУ.
Шэньжэнь хот бол өргөн хэрэглээний цахилгаан бараа үйлдвэрлэлээрээ алдартайгаас гадна томоохон брэндүүдийн дуураймал бүтээгдэхүүн хийдгээрээ ч алдартай. Дуурайлган хийсэн загвараа тэд shanzhai хэмээн нэрлэнэ. Тэдний хувьд энэ бол дуурайлган хийх явц биш бөгөөд тэс өөр зүйлийг илтгэдэг байна. Түүнчлэн энэ хотоос стартап компаниуд ихээр төрөн гарах болсон байна.
34 настай Хэ Жянькүй Шэньжэний Наньфан технологийн их сургуулийн дэд профессор бөгөөд нэгэн технологийн компанийн ТУЗ-ийн дарга юм. Тэрээр 6 жилийн өмнө генийн шинжилгээний төхөөрөмж, туршилтын эмийн технологийн компани байгуулж, 2017 онд дэлхийн тэргүүний түвшний генийн шинжилгээний 3 дахь үеийн Азийн анхны аппаратыг зохион бүтээж, үйлдвэрлэсэн юм. Тус төхөөрөмж бүрмөсөн бие даасан оюуны өмчийн эрхтэй гэдгийг Хэ Жянькүй ярьж байлаа.
“Сургуулийн үйлдвэрлэлийг хөгжүүлэх бодлогын дэмжлэгээр бид генийн судалгааны Ханьхай компанийг байгуулж, генийн шинжилгээний 3 дахь үеийн аппарат зохион бүтээж, үйлдвэрлэсэн юм. Хоёр долоо хоногийн өмнө бид 4 дэх ээлжийн хөрөнгө босголт хийж, 6 аж ахуйн нэгж байгууллагаас 218 сая юанийн хөрөнгө хуримтлууллаа. Бид Шэньжэнь хотноо Азийн генийн шинжилгээний 3 дахь үеийн аппаратын иж бүрэн үйлдвэрлэлийн шугамыг бий болгож, 100 хувь дотоодын технологиор үйлдвэрлэсний дараа генийн шинжилгээний өртгийг 1000 ам.доллараас 100 ам.доллар хүртэл бууруулна. Ирээдүйд Хятад төдийгүй дэлхийн аль ч орны анхан шатны эмнэлгүүд ийм шинжилгээ хийх боломжтой болох юм. ” хэмээн ярьсан юм.
Доктор Чэнь Нинь 2014 онд Шэньжэньд компани байгуулж, хүний дүрсийг хөдөлгөөнт байдалд таних дэлхийн анхны системийг зохиожээ. Тус систем нь үй олон хүний дүрс дундаас хайх хүнийхээ дүрсийг хэдхэн секундэд олж, түүний хөдөлгөөнт ул мөрийг тодруулах чадвартай юм. Энэ систем ашиглалтад орсноос хойш цагдаагийн байгууллага үүнийг ашиглаж 4000 мянга гаруй гэмт хэрэг илрүүлж, сураггүй болсон хүүхэд хөгшдийг цөөнгүй удаа олсон аж. Тус компанийг үүсгэн байгуулагч Чэнь Нинь хэлэхдээ “Өнөөдөр эргээд бодоход Шэньжэньд ирсэн маань аз болсон байна. Шэньжэньд нээлттэй, багтаамжтай иновацын орчин, зах зээлийн эрхлэлтийн механизм байгаа тул Юньтянь Лифей компани маань энэ хотод олон шинэ бүтээл хийсэн юм. Эндхийн тоглоомын дүрэм ил тод, амласандаа хүрдэг. Энэ бол техникийн боловсон хүчний хамгийн дуртай иновацын орчин гэж бид боддог.” гэжээ.
ХКН-ын Шэньжэнь хотын хорооны нарийн бичгийн дарга Ван Вийжүн “Одоо Шэньжэнь хот Хятадад эн тэргүүнд аж ахуйг гол цогц болгож, аж үйлдвэр судалгааг нягт уялдуулсан технологийн инновац бүтээх систем байгуулан, судалгаа хийх хүн 90 хувь, судалгааны байгууллага 90 хувь, судалгааны хөрөнгө оруулалт 90 хувь, патентын эрхийг авах аж ахуйн нэгж 90 хувь гэсэн онцлогийг бүрдүүлсэн. Судалгаанд хөрөнгө оруулалт хийх талаар Шэньжэнь хотын нийт хөрөнгө оруулалт ДНБ-ний 4.13 хувийг эзэлж, БНСУ, Израйль зэрэг орны хөрөнгө оруулалтын түвшинд хүрлээ. PCT олон улсын патентын эрх авахаар өргөдөл өгсөн хэмжээ ноднин 20 400 ширхэгт хүрч, 14 жил дараалан Хятадын хотуудыг тэргүүлсэн юм. Шэньжэньд улсын зэрэглэлийн дээд технологийн аж ахуйн нэгж 11 200 байна” гэсэн тайлбарыг өгөв.
20 сая хүн амтай Шэньжэнь хотын хувьд, бүх төрлийн чадварлаг боловсон хүчин нийт хүн амын 1/4 хувийг эзэлж байна. ХКН-ын Шэньжэнь хотын хорооны нарийн бичгийн дарга Ван Вийжүн хэлэхдээ “Биеэ даан инновац бүтээхийг хотын хөгжлийн гол стратеги болгож, шинжлэх ухаан, технологийн дэвшлийг цөм болгон эм эмнэлгийг дээд технологийн тоног төхөөрөмж, шинжлэх ухаан технологийн багаж хэрэгсэл, аж үйлдвэрийн хяналтын тоног төхөөрөмж, аж үйлдвэрийн суурь машин, гол гол чип, зангилаа эд анги зэрэг технологийн чухал судалгаа хийж, оюуны өмчийн эрхийг хуулиар хатуу хамгаалж, шинэ эриний онцлогтой “Шэньжэний дизайн”, “Шэньжэний брэнд” бүтээнэ” гэжээ.
Хятадын Шэньжэнь хот гадаадад төгссөн мэргэжилтнүүдийг татах бодлого хэрэгжүүлж эхэлснээс хойш 15 жил болжээ. Гадаадад төгссөн олон залуус “Хятадын Цахиурын хөндий” хэмээгдсэн Шэньжэнийг сонгож бизнесийн гараагаа эхлүүлж байна.
