Элсэлтийн ерөнхий шалгалтын зарим асуудлаар Боловсролын Үнэлгээний төвийн ЭЕШ хариуцсан ахлах мэргэжилтэн М.Болдсайханаас тодрууллаа.
-Энэ жил улсын хэмжээнд нийт хэдэн хүүхэд ЭЕШ өгөх вэ?
-Энэ жил ерөнхий боловсролын арванхоёрдугаар ангийг улсын хэмжээнд 35800 орчим хүүхэд төгсөхөөр байгаа. Үүн дээр өмнө жил арванхоёрдугаар ангиа төгссөн боловч их дээд сургууль элсэн орж чадаагүй, сургуулиа солих хүсэлтээр дахин ЭЕШ өгөх хүсэлтэй хүүхдүүдийг нэмээд ойролцоогоор 39 мянган хүүхэд шалгалт өгнө гэж урьдчилсан байдлаар тооцоолсон байгаа. Энэ дагуу элсэлтийн ерөнхий шалгалтын бэлтгэл ажлыг хангаад явж байна.
-Бүртгэл дуусахад сар орчмын хугацаа үлдсэн байна. ЭЕШ өгөх хүүхдүүд юунд сайн анхаарах хэрэгтэй вэ?
–ЭЕШ-д бүртгүүлэхдээ дөрвөн төрлийн бичиг баримтыг бүрдүүлсэн байх шаардлагатай. Нэгдүгээрт, иргэний үнэмлэх болон түүнтэй дүйцэх бичиг баримт. Хоёрдугаарт, интернэт гүйлгээ хийх эрх бүхий карт, эсвэл утсандаа интернэт гүйлгээ хийх аппликейшн суулгасан байх. Гуравдугаарт, 3×4-ийн хэмжээтэй цээж зургийг файл хэлбэрээр бэлдсэн байх шаардлагатай. Хүүхдүүдийн түгээмэл гаргадаг алдаа нь зургаа урьдчилан бэлдээгүйгээс шалтгаалж шаардлага хангахгүй зураг гар утсаараа дарж оруулдаг. ЭЕШ-ын бүртгэл онлайнаар явагдаж байгаа тул хүүхдүүд интернэт банкаар гүйлгээ хийж төлбөр төлөх боломжтой.
Элсэн суралцагч мэргэжил, сургуулийнхаа талаар судалгааг бүрэн хийгээгүйгээс үүдэж хичээл сонголтоо буруу хийх тохиолдол гардаг. Бүртгэлийн явцад хичээл нэмэх боломжтой боловч хасах шилжүүлэх боломжгүй байдаг.
-Элсэлтийн ерөнхий шалгалтад орох эрхийг олгодог монгол хэл, бичгийн шалгалт хавар зохион байгуулагддаг. Энэ шалгалтын тов гарсан уу?
-Элсэлтийн ерөнхий шалгалтаас өмнө монгол хэл, бичгийн шалгалтыг авах шийдвэр Монгол Улсын Засгийн газрын 37 дугаар тогтоолын дагуу батлагдаж 2014 оноос хойш зохион байгуулагдаж байгаа. Их, дээд сургуульд элсэн суралцаж байгаа хүүхдүүд монгол хэл, бичгийн шалгалтыг заавал өгөх шаардлагатай байдаг. Тус шалгалтыг ирэх тавдугаар сард зохион байгуулахаар бэлтгэл ажил хангаад явж байна.
Элсэлтийн ерөнхий шалгалтын товыг Боловсролын Үнэлгээний төвөөс БШУЯ-д санал хүргүүлнэ. БШУЯ, УОК зөвшилцөн эцсийн товыг зарлана. Яг одоогийн байдлаар элсэлтийн ерөнхий шалгалт хэдний өдрүүдэд зохион байгуулагдах, монгол хэл, бичгийн шалгалтыг эцсийн шалгалтаас өмнө зохион байгуулах уу эсвэл хамтад нь зохион байгуулах уу, босго оноотой байх уу зэрэг асуудлууд цар тахлын нөхцөл байдлаар шууд хамааралтай.Бидний хувьд зургадугаар сарын 20-ны өдрөөс хойш зохион байгуулбал тохиромжтой гэж үзэж, бэлтгэл базааж байна.
-Энэ жилийн элсэлтийн ерөнхий шалгалтын агуулга ямар байх вэ. Хичээл сургуулийн үйл ажиллагаа хоёр жил цахимаар орсонтой холбогдуулж агуулга өөрчлөгдөх үү?
-Энэ жил арванхоёрдугаар анги төгсөж байгаа хүүхдүүдийн хувьд их онцлог байгаа. Яагаад гэвэл хоёр хичээлийн жилийн турш хичээл сургуулийн үйл ажиллагаа тасалдсан. Тэгэхээр Боловсролын Үнэлгээний төвөөс тавдугаар сарын 15 гэхэд шалгалтын агуулга тодорхойлсон бүлэг, вариантыг нийтэд зарлана. Ерөнхийдөө танхимаар судалсан агуулгад суурилж шалгалтыг зохион байгуулна. Өөрөөр хэлбэл, суурь боловсролын агуулга болон бүрэн дунд боловсролын заавал судалсан хичээлийн танхимд суралцсан агуулгуудаар шалгалтыг зохион байгуулахаар төлөвлөж байна.
-ЭЕШ-ын талаарх дэлгэрэнгүй мэдээллийг хаанаас авах боломжтой вэ. Мөн бүртгэл хэдний өдөр дуусах вэ?
-Боловсролын үнэлгээний төвөөс ЭЕШ-ын мэдээллийг өөрийн сайт болон help.eec.mn-ээр хүргэн явж байна. Мөн гол анхаарах зүйлийн талаар сургалтуудыг цаг алдалгүй олонд хүргэж ажиллаж байгаа. ЭЕШ-ын бүртгэл дөрөвдүгээр сарын 20-ны өдрийн 18:00 цагт дуусна.
