Ерөнхийлөгчийн тамгын газрын дарга Ө.Шижир “Үндсэн хууль дээр явж байгаа Ерөнхийлөгчтэй холбоотой асуудал өнөөдөр хамгийн их яригдаж, бичигдэж байгаа асуудал. Үндсэн хуулийн цэцийн гишүүн Солонгоогоос хоёрдугаар сарын 10-ны өдөр Ерөнхийлөгчийн тамгын газарт ХҮН-ын дарга, УИХ-ын гишүүн Т.Доржханд болон Д.Үүрцайх нарын гаргасан гомдол мэдээллийн дагуу Ерөнхийлөгчийг 24-ний дотор байр суурийг тодруулах шаардлагатай байна гэсэн албан бичиг үрүүлсэн. Энэ албан бичгийн хүрээнд Ерөнхийлөгч 24-нд Үндсэн хуулийн цэцэд очиж өөрийн байр сууриа илэрхийлсэн. Энэ бол Үндсэн хуулийн цэцэд нөлөөлөх гэсэн, санаатайгаар зохион байгуулсан үйл ажиллагаа биш. Ерөнхийлөгчийн сонгууль бол Монгол Улсын Ерөнхийлөгчийн тухай хуульд заасны дагуу явна. Үндсэн хуулийг улс төрийн зорилгоор тайлбарлах, мушгин гуйвуулах, улстөржүүлэх үйл ажиллагаа зохион байгуулалттай, тасралтгүй явж байна. Гуравдугаар сарын 19-нд Цэцийн бага суудлын хуралдаан болсон байна. Бага суудлын хуралдаан тодорхой шийдвэр гаргасан ч үүнийг улстөржүүлж байна. Өнөөдөр Хууль зүйн байнгын хорооны хуралдаанаар Үндсэн хуулийн Цэцийн гишүүнийг чөлөөлөх асуудлыг оруулж ирж байна. Хугацаа нь дууссан хоёр гишүүний алийг нь түрүүлж татах зохицуулалт хуульд байхгүй. Гэтэл өнөөдөр улс төрийн зорилгоор Цэцийн гишүүн Ш.Цогтоог нэн даруй чөлөөлөх үйл ажиллагаа явж байна.
Ерөнхийлөгчийн зөвлөх Я.Санжмятав: Үндсэн хуулийн цэцийн бага суудлын хуралдаан таван хүний бүрэлдэхүүнтэй хуралдаж үүний гурав нь санал өгдөг юм байна. Санал өгсөн гурван хүний хоёр нь Буяндэлгэрийн тавьсан асуудлыг зөв гэж үзсэн байна. Нэг гишүүн нь хурлаа дуусмагц гараад явчихсан гэдэг нь маш ноцтой асуудал. Ямар нэгэн нам, бүлэглэлийн нөлөөлөлд Үндсэн хуулийн цэц түүний гишүүн орж болохгүй. Үүний дараагаар тухайн шийдвэр албажих ёстой. Гэтэл Цэцийн гишүүн Ш.Цогтоогийн асуудлыг хугацаа нь дууссан гэдэг шалтгаанаар Их хурал руу оруулж ирж байна. Үндсэн хуулийн цэц хуулийнхаа дагуу шийдвэрээ гаргах хэрэгтэй. Цэцийн хоёр гишүүний хугацаа дууссан учраас Дээд шүүхээс сонгон шалгаруулалт зарласан. Гэтэл 10 хүний хүнээс ганцхан хүнийг оруулж ирж байгаа нь ямар учиртай юм бэ. Энэ бол Монгол Улсад нэг намын дарангуйлал бий болсон гэдгийг илэрхийлж байна.
Ерөнхийлөгчийн зөвлөх Л.Болд: 1990 оноос хойш Үндсэн хуулийн бүх процесст би оролцсон. 1999 онд Цэцийн үйл ажиллагаанаас болж Үндсэн хуулийн хямрал болж байсан. Өнгөрсөн онд Үндсэн хуулиа дахин өөрчилсөн. Энэ өөрчлөлт 30 жил гажуудаж байсан алдаа дутагдлыг засахын төлөө байсан. Гэтэл Ерөнхийлөгч Х.Баттулгыг дахин сонгуульд оруулахгүй байх өөрчлөлт болгож байгаа нь маш аюултай. Энэ дахин Үндсэн хуулийн хямрал руу түлхэж байна. Үүний ард ард түмэн дандаа хохирч байдаг. 30 жилийн ололт амжилт, ардчиллаа үгүй хийлгэхийг ард түмэн зөвшөөрөхгүй. Үндсэн хуулиа хамгаалцгаая.
