Засгийн газрын гишүүд Төрийн ордонд бизнес эрхлэгчдийн төлөөлөлтэй уулзаж байна. Уулзалтад Ерөнхий сайд, бусад сайд нар оролцон, хувийн хэвшлийнхний асуултад хариултад байна.
УУХҮ-ийн сайд Г.Ёндон: Уул уурхайн биржийн талаар олон удаагийн хэлэлцүүлэг өрнөх ёстой. Төрийн мөнгө хаашаа явдаг нь ил тод болох ёстой. Бид энэ биржийн үзэл баримтлалаа Сангийн яамаар батлуулсан. Олон талаас нь харсны дараа хуулиа батлах ёстой юм. Бусад улсад ийм бирж байдаг. Хувийн хэвшлийнхэн энэ биржээр үйлчлүүлэх нь чухал. Эхний ээлжид төрийн өмчит уул уурхайн компаниуд энэ биржээр бүтээгдэхүүнээ худалдана. Энэ механизм их чухал.
Хөрөнгийн биржийн мэдээллийн технологийн програм хангамж, одоогийн бааз суурийг ашиглахын тулд нэмэлт төлбөр төлөх ёстой юм билээ. Бид Х.Алтай захиралтай уулзсан. Шивээ Хүрэн боомтод терминал барьснаар биржийн дэд бүтцийг бүрдүүлнэ. Ханги Мандалд ч терминал барина. Хувийн хэвшил хөрөнгөө гарган барьж болно. Уул уурхайн дараагийн супер цикл эхэлсэн. Өмнөх супер циклээр улс юу ч хийгээгүй, Бид бэлэн биш байв. Иймд одооноос боловсруулах үйлдвэрээ хурдавчлах хэрэгтэй. Энэ зурвас үеийг ашиглах ёстой. Улаан металл буюу зэсийн баяжмал боловсруулах үйлдвэр бидэнд давуу тал олгоно. Байршлын хувьд Эрдэнэт үйлдвэр, Бор-Өндөр гэсэн хувилбарууд бий. Эрдэнэт хамгийн тохиромжтой. “Оюу толгой”-н үйлдвэр тусдаа байх нь зөв. Сайншандад байж болох юм. Тэгэхээр хоёр үйлдвэрийн байршлыг ярина. Хөрөнгө оруулагчид байршлаа өөрсдөө сонгоно.
НӨАТ-ын тухай хуулийг эргэн харах, нийгмийн даатгалын шимтгэл олон улсын дундажтай харьцуулахад өндөр байгааг бууруулах санал дэвшүүлэв.
Ерөнхий сайд Л.Оюун-Эрдэнэ: Хэдүүлээ уулзаад тарах биш, зөвлөмж гаргаад, хоол идэн, зургаа авахуулаад өнгөрмөөргүй байна. Тэгээд хэдэн сарын дараа дахиад л өнөө асуудлаа ярьдаг. Энэ байдлыг өөрчилье.
“Алтан жолоо” группийн захирал В.Энхбаатар: Тээвэр хүнд байна. Замын-Үүд, Эрээнээр нэвтэрдэг машины тоо эрс цөөрлөө. Тэнд ажиллаж буй төрийн албан хаагчид авлига аваад байна гэсэн хардлага төрсөн. Гэтэл тийм биш. Тэнд ажиллаж буй хэдхэн жолооч, Эрээний хятад иргэдтэй хамтран үнээ өсгөж байна. Тээврийн зардал 5 дахин өслөө. Үүнийг шийдэж болох асуудал шүү дээ. Өмнө нь өдөрт 150-200 машин гардаг байхад хэвийн байв.
“Драгон холдинг”-ийн захирал н.Октябрь: Бид сүүлийн жилүүдэд Авто тээврийн үндэсний төвтэй амжилттай хамтран ажиллалаа. Бид ачааллаа дийлэхээ больсон. 16 аймаг руу зорчих иргэд манай терминалаас хөдөлдөг. 2015 онд шинэ терминал байгуулсан ч иргэдийн зорчих хөдөлгөөн жилээс жилд өссөөр байгаа тул шинэ терминал, авто зогсоол барихад дэмжлэг үзүүлнэ үү.
Зам тээврийн хөгжлийн сайд Л.Халтар: Гашуун Сухайт боомт цаашид хэрхэн ажиллах төлөвлөгөөг боловсруулсан. Удахгүй Засгийн газрын хуралдаанаар хэлэлцэнэ. Манай яам, ААН-үүдтэй хамтран ажиллана. Шилжүүлэн ашиглах терминалыг хувийн хэвшил өөрсдийн хөрөнгөөр барихад нээлттэй.
Одоо Замын-Үүдэд 74 монгол жолооч ажиллаж байна. Тэдний тоог 100-д хүргэх зорилгоор ГХЯ-тай хамтран ажиллаж байна. Драгон төвийн хувьд газрын асуудал бий. Бид дэмжин ажиллана.
