Нийслэлийн болон орон нутгийн эрүүл мэндийн салбарынхан өнөөдөр жагсаал хийлээ. Тэд Засгийн газарт тавьсан шаардлагыг нь биелүүлэхгүй бол Олон улсын сувилагчдын өдөр буюу тавдугаар сарын 12-нд баярлахгүй, ажил хаялт зохион байгуулахаа мэдэгдсэн юм. Эрүүл мэндийн салбарт ажиллаж байгаа сувилагч нарын дийлэнх нь 300-400 мянган төгрөгийн цалинтай ч цалингийн зээл, өрнөөс өрнийн хооронд амьдарч байна. Түүнчлэн эмнэлэг бүрт сувилагчийн орон тоо дутуугаас гурваас дөрвөн сувилагчийн ажил нэг л сувилагч дээр төвлөрдөг байна гэдгийг тодотгож хэлсэн юм.
Монгол улсын төр засаг эрүүл мэндийн салбарыг элгээр мөлхүүлсэн
Монголын эрүүл мэндийн ажилтны ҮЭ-ийн холбооны дарга Б.Мягмар хэлэхдээ “Шударга хөдөлмөрийг тогтоох цагчин болсон гэдэг шаардлагыг тавихаар өнөөдрийн жагсаал цуглааныг зохион байгуулж байна. Үүний дараа тодорхой хугацаанд тэмцлийн арга хэмжээг үргэлжлүүлнэ явуулна. Гэхдээ олон шатны тэмцлийг ахиж хийхгүй. Шууд ажил хаялт зарлахыг шаардаж байгаа. УИХ, Засгийн газар, Эрүүл мэндийн яамнаас цалин нэмэх асуудал дээр дорвитой шийдвэр гаргахгүй байгаа. Хэвлэл мэдээллээр 7-49 хувиар цалин нэмнэ гэж ярьж байна. Гэвч бодит байдал дээр цалин нэмсэн байдал байхгүй. Бид энэ онд цалин нэмэхийг шаардаж байгаа. Засгийн газар хоёрдугаар улирлаас хэлэлцээр хийнэ гэж ам алсан. Одоо энэ хэлэлцээрийг хэрэгжүүлэх хэрэгтэй. Эдгээр арга хэмжээг авахгүй эмч сувилагч нар хугацаагүй ажил хаялт зарлана. Одоо Монголын эрүүл мэнд салбарт сувилагч болон тусгай мэргэжилтний тоо 19 мянга байгаа. Эрүүл мэндийн салбарт 48 мянган ажиллаж байгаа. Үүнээс ачааны хүндийг 19 мянган тусгай мэргэжилтэн болон сувилагч нар үүр ч байна. Сувилагч нар 15 хоногтоо 15-20 мянган төгрөгийн цалин авч байна. Цалингийнхаа зээлийг төлөөд гурван мянган төгрөгтэй гэртээ очиж байна шүү дээ. Монгол улсын төр засаг эрүүл мэндийн салбарыг элгээр мөлхүүлсэн. Иймээс үүнийг одоо өөрчлөх цаг болсон. Мөн 24 цаг ажиллаж байгаа боловч илүү цагийн цалингаа авч чадахгүй, гурваас дөрвөн хүний ажлыг давхар хийж хөдөлмөрийн мөлжлөгт автаж байгаа учраас Монгол Улсын ерөнхийлөгч, УИХ-ын даргад хөдөлмөрийн мөлжлөг таслан зогсоох хуулийн төслийг өргөн барьж байна” гэлээ.
Өрхийн эмч сувилагч нарыг хөдөлмөрийн үнэлэхгүй байна
Харин ннийслэлийн өрхийн эрүүл мэндийн ажилчдын үйлдвэрчний эвлэлийн хорооны дарга Ч. Өнөрсайхан “Өрхийн эрүүл мэндийн төвийн сувилагч нар үндсэн үйлчилгээ үзүүлэхээс гадна сэргээн засах үйлчилгээ болон Засгийн газраас хэрэгжүүлж байгаа бүх хөтөлбөр дээр ажиллаж байна. Тухайлбал, Элэг бүтэн монгол хөтөлбөрийн В,С вирусийн шинжилгээг өрхийн эмч, сувилагч нар авсан. Харин өнөөдөр хөдөлмөрийн ямар ч үнэлэмж байхгүй. Ингэж өрхийн эмч сувилагч нарыг хөдөлмөрийн үнэлэхгүй байна” гэв.
Одоо нэг сувилагчид 15-20 хүнтэй ажиллаж байна
Дундговь аймгийн нэгдсэн эмнэлгийн мэс засал, хагалгааны ахлах сувилагч Д.Отгонтогсоос зарим зүйлийг тодрууллаа.
-Сувилагч болон эмнэлгийн ажилчдын цалин хөлсний асуудлаар жагсаал байгуулж байна. Таны хувьд орон нутгаас ирж оролцож байгаа хүний хувьд ямар байр суурьтай байна вэ?
-Эмч нарын нийгмийн асуудал болон хүний нөөцийн асуудлыг нэмэгдүүлэх шаардлагатай. Хөдөө орон нутагт цалин бага учраас ажиллах боловсон хүчин байхгүй байна. Одоо ахмад сувилагч нар ажлаа хийж, үнэнчээр зүтгэж байна. Шинэ боловсон хүчнүүд цалин бага ажлын ачаалал их болохоор ажиллах боловсон хүчин байхгүй байна. Би эрүүл мэндийн салбарт 30 –аад жил ажиллаж байгаа. Одоо 500 мянган төгрөгийн цалин авч авна. Үүнээс 20 хувь нь суутгалдаа явдаг. Үүнээс 30-40 хувь банкныхаа зээлэнд өгч байна. Ингээд үлдсэн хэдэн төгрөг амьдралд хүрэлцдэггүй. Ийм бага цалин авдаг хирнээ маш их ачаалалтай ажилладаг.
-Танай аймгаас хэчнээн эмч сувилагч ирсэн вэ?
-Аймгийнхаа эмч нарыг төлөөлөөд 12 эмч сувилагч ирсэн. Бидний цаана маш олон эмч сувилагч нар цаг наргүй ажиллаж байгаа.
-Хөдөө орон нутгийн эмч нарын ажиллах орчин ямар байна вэ?
-Ер нь ажлаа ачааллын хувьд хөдөө хот гэсэн ялгаа байхгүй. Ажлын ачаалал маш байдаг. Одоо нэг сувилагчид 15-20 хүнтэй ажиллаж байна Уг стандартаа 6-7 өвчин ажиллах ёстой байдаг.. Гэтэл бид 2-3 дахин ачаалалтай ажиллаж байна. Мөн хөдөө орон нутгийн эмч нар илүү цагаар ажилладаг. Иймээс төр засгаас эрүүл мэндийн салбартаа бага гэсэн анхаарал тавих хэрэгтэй гэдгийг хэлмээр байна.
-Багш нар болон эмч нар цалин нэмэх асуудлаар удаа дараа жагсаал цуглаан зохион байгуулж байна. Ингэж жагсаж цуглуулаад үр дүн гарч байна уу?
-Ер нь үр дүнд хүрэхгүй байна. Өнгөрсөн жил жагсаал зохион байгуулсан, саяхан бас жагсаал зохион байгуулсан. Одоо энэ жагсаалаар үр дүнд хүртэл явна. Сайдтай уулзсан цалин хөлс нэмэх асуудал яригдсан боловч энэ биелэхгүй байна. Зөвхөн аман яриагаар цалин нэмэгдэж байна. Цалин мөнгө нэмэх асуудлыг бодит болтол тэмцэнэ.
