Монгол Улсын нийт гадаад өр 2020 оны эцэст 32.2 тэрбум ам.доллар болж, өмнөх оноос 1.5 тэрбум ам.доллар өссөнийг Үндэсний статистикийн газраас мэдээлсэн.
Монгол Улсын нийт гадаад өр ДНБ-ээс 2.5 дахин их, урсгал дансны орох урсгалаас 3.8 дахин их, өрийн үйлчилгээ, хүүний төлбөрүүд экспортын орлогын 44 хувийг эзэлж байгаа нь гадаад өрийн эмзэг байдал өндөр байгааг харуулж байгаа аж.
ОУВС-гийн хөгжиж буй орнуудад зориулсан гадаад өрийн тогтвортой байдлын аргачлалын дагуу манай орны гадаад өрийн дунд хугацааны тогтвортой байдлыг шинжлэхэд гадаад өр 2020-2025 онд тогтвортой бөгөөд суурь төсөөллөөр нийт гадаад өрийн түвшин 2025 онд ДНБ-ий 178 хувь болж, дунд хугацаанд эмзэг байдал алгуур буурах үр дүн гарчээ.
Гэвч гадаад өрийн тогтвортой байдлын симуляци шинжилгээгээр эдийн засагт зээлийн хүү өсөх, эдийн засгийн өсөлт саарах, түүхий эдийн үнэ буурах шок жил бүр нэгэн зэрэг илэрвэл 2025 он гэхэд нийт гадаад өр суурь төсөөллөөс ДНБ-ий 115 хувиар өндөр болж болзошгүйг мөн анхааруулсан байна.
Монгол Улс 2021-2024 онд нийт 13.1 тэрбум ам.долларын гадаад өрийн үндсэн болон хүүний төлбөр төлөх, эсвэл дахин санхүүжүүлэх шаардлагатай. Үүнээс Засгийн газар, Монгол Улсын Хөгжлийн банкны 5.7 тэрбум ам.долларын хуваарьт төлбөр байгаагаас 2.8 тэрбум ам.доллар нь Засгийн газрын гадаад бондын хүүний болон үндсэн төлбөр, 1.8 тэрбум ам.доллар нь Засгийн газрын гадаад зээлийн хүүний болон үндсэн төлбөр, 1.1 тэрбум ам.доллар нь Хөгжлийн банкны бонд, гадаад зээлийн үндсэн төлбөр эзэлж байгаа юм байна. Төв банк 2023 онд Хятадын Ардын банктай байгуулсан своп хэлцлийн 1.8 тэрбум ам.долларыг төлөх бол хувийн сектор нийт 5.5 тэрбум ам.долларын үндсэн болон хүүний төлбөр төлөх хуваарьтай байна.
Монголбанк болон эдийн засагчдын зүгээс ойрын хугацаанд хүлээгдэж буй томоохон өр, төлбөрийг аль болох өртөг багатайгаар дахин санхүүжүүлэх арга замыг эрэлхийлж, гадаад өрийн эргэн төлөлтийн хүндрэлд орох нөхцлөөс сэргийлэх нь зүйтэй гэж зөвлөж байгаа аж.
