Монгол Улсын сайд, Нийслэл Улаанбаатар хотын авто замын түгжрэлийг бууруулах үндэсний хорооны дарга Ж.Сүхбаатар нийслэлийн түгжрэл бууруулахад авч хэрэгжүүлж буй арга хэмжээний талаар танилцууллаа.
Тэрээр “Миний хувьд нэгдүгээрт нийтийн тээврийн салбарыг шинэчлэх бодлого барьж байна. Хоёрт, зорчилт хөдөлгөөнийг сайжруулах багц асуудал. Гуравт, авто замын сүлжээг өргөтгөх. Дөрөвт, 2040 он хүртэлх Улаанбаатар хотын хөгжлийн ерөнхий төлөвлөгөөг гаргах гэсэн дөрвөн бодлогыг баримталж ажиллаж байна.
Иймд дараах ажлыг хэрэгжүүлнэ.
-
160 цахилгаан автобус, 600 дизель хөдөлгүүртэй автобус, дунд багтаамжтай 50 автобус оруулж ирэхээр болсон. Нийт 810 автобус орж ирэхээс 224 нь орж ирсэн байна. Арванхоёрдугаар сар гэхэд автобуснууд орж ирнэ. Уг автобус нь утас цэнэглэж болдог, дулаахан, олон улсын стандартын шаардлага хангасан автобус байх юм.
-
Нэгдүгээр эгнээг одоо Энхтайваны өргөн чөлөөнд хэрэгжүүлж байна. Үүний өргөжүүлж, Чингисийн өргөн чөлөө, Чингэлтэй өргөн чөлөө, Ард аюушийн өргөн чөлөөгөөр нэгдүгээр эгнээг чөлөөлнө. Мөн нэгдүгээр эгнээний замыг өргөтгөж, зарим чиглэлийн автобусны эргэх зам буюу рэйсийг багасгана.
-
Хот тойрсон гольцоо замтай болно. Үүний хүрээнд Улаанбаатар хотыг тойрсон “Шинэ тойрог зам” төслийг хэрэгжүүлнэ. Уг төслийг Зам, тээврийн хөгжлийн яам хариуцаж байгаа бөгөөд төр, хувийн хэвшлийн түншлэлээр хийнэ. Ингэснээр түгжрэл 10 хувь буурна. Нийтдээ 12 ийм тойрог зам хийнэ. Ингэснээр архаг түгжрэлд түгжигдэхгүй юм.
-
RFID системийн ажиллагааг эхлүүлнэ. Ингэснээр үндсэн зорчилт хөдөлгөөнийг бүртгэдэг, хянадаг болох юм. Одоо гар аргаар удирддаг бол RFID нэвтрүүлснээр удирдлага автомат болох юм. Мөн уг системийг нэвтрүүлснээр даатгалаа төлөөгүй, торгуультай машиныг хөдөлгөөнд оролцуулахгүй болно. Системийг өвлөөс ашиглалтад оруулахаар төлөвлөж байна. Ингэснээр түгжрэл 20 хувь буурна.
-
Сургууль, цэцэрлэгийг хангалтай хэмжээнд барьж байгуулна. Одоогоор 52 сургууль хэрэгтэй. Хот бонд босговол 100 тэрбум төгрөгийг сургууль барихад зарцуулахаар төлөвлөсөн” гэв.
