Монголын допингийн эсрэг үндэсний төвөөс өнөөдөр мэдээлэл хийлээ. Уг хуралд Допингийн төвийн гүйцэтгэх захирал Г.Сүхбат, ерөнхий их эмч Д.Энхсанаа нар оролцлоо. Сүүлийн үед допингийн шинжилгээтэй холбоотой худал мэдээлэл олон нийтэд тараад байгаа. Уг төвд ажиллаж буй ажилчид бол ихэнхдээ эмч, багш мэргэжилтэй хүмүүс байдаг. Тиймээс тангараг өргөсөн мэргэжилтнүүд ажилладаг учраас худал хуурмаг мэдээлэл гаргаж, ард иргэдийн дунд төөрөгдөл оруулж байгаад залруулга хийх үүднээс энэхүү мэдээллийг хийж байна гэв.
Өнгөрсөн онд Үндэсний их баярын наадмын дараа 16 бөхөд допингийн шинжилгээ авсан бол үүний дараа 36 бөхөөс авчээ. Сүүлд авсан шинжилгээгээр таван бөх хориотой бодис хэрэглэсэн нь тогтоогдсоныг олон нийтэд мэдээлсэн. Гэтэл сүүлийн үед бөхчүүдтэй холбоотой мэдээлэл тарж, төвийн үйл ажиллагааг буруутгаж байгааг хэллээ.Мөн худал мэдээлэл тарааж, олон нийтийг төөрөгдөлд оруулсан зарим мэдээллийн сайтыг шүүхэд өгөхөө мэдэгдлээ.
Бид допингийн шинжилгээг аваад хариу илгээд болохоос биш арга хэмжээг авдаг байгууллага биш
Допингийн төвийн ерөнхий их эмч Д.Энхсанаагаас зарим зүйлийг тодрууллаа
-Бөхчүүдээс допинг илэрсэн асуудал нэлээд шүүмжил дагуулж байгаа. Ер нь танайх өнгөрсөн онд хичнээн шинжилгээ хийсэн вэ?
-Допингийн шинжилгээг стандартын дагуу авч байгаа мэдэхгүй юм шиг мэдэн будилж байгаа асуудлыг таслан зогсоох гэж бид мэдээллийг хийж байна. Өнгөрсөн 2017 онд допингийн эсрэг үндэсний төвөөс спортын 20 гаруй төрлөөр хичээллэж буй тамирчдаас нийт 270 гаруй тамирчдаас шинжилгээг авсан. Эдгээрийг тэмцээний болон тэмцээний бус үеийн шинжилгээг авч Дэлхийн допингийн эсрэг агентлагийн итгэмжлэгдсэн лаборатори болох БНСУ-ын Допингийн лабораторид илгээж шинжлүүлдэг. Тиймээс шинжилгээ ямар асуудалгүй.. Бид допингийн шинжилгээг аваад хариу илгээд болохоос биш арга хэмжээг авдаг байгууллага биш. Бөхчүүддээ арга хэмжээ авах нь МҮБХ-ны асуудал. Допинг илэрсэн таван бөх өөрсдийнхөө хэрэглэсэн эм тариагаа олон нийтэд мэдээлсэн шүү дээ.
-Манай тамирчид допингийн талаар хэр сайн мэдлэг мэдээлэлтэй байдаг вэ?
-Бид монгол байгаа бүх тамирчид мэдээлэл өгч чаддаг гэж хэлэхгүй. Үндэсний шигшээ багийн тамирчид болон спортын холбоо дээр очиж тамирчдыг сургалтад суулгах арга хэмжээ авдаг. Өнгөрсөн жилийн үндэсний бөхчүүдэд сургалтад зохион байгуулах гээд олимпийн хороон дээр зар тавихад арван хэдэн бөх ирсэн. Сургалт зохион байгуулахаар ирдэг хүмүүс маш цөөхөн байна. Иймээс үндэсний бөхчүүд мэдлэг муутай. Харин манай улсын шигшээ баг болон үндсэн холбоодын баг тамирчид допингийн талаар мэдлэг харьцангуй өндөртэй. Бид наадам дөхүүлж байгаад бөхийн галаар явж сургалт хийдэг боловч зардал мөнгөний боломж муутай учраас бүх галаар явж чаддаггүй.
-Манай бөхчүүдээс ямар төрлийн бодис илэрсэн вэ?
-Хориотой бодис хэрэглэх нь эрүүл мэнд, эрсдэлтэй байдаг. Спорт шударга өрсөлдөөнд дунд явах учраас Дэлхийн допингийн эсрэг агентлаг үүнд хатуу анхаарлаа хандуулдаг. Манай бөхчүүдээс ихэвчлэн гормоны төрлийн бодисууд илэрсэн.Гормоны төрлийн бодис өөрөө маш олон төрлийн үйлчилгээтэй байдаг. Үүнийг нэгэн биеийн массыг их нэмдэг. Хэрэглэсний дараа ямар хор нөлөөтэй гэдгийг тэд ойлгохгүй байна.
-Манайх допингийн шинжилгээг Солонгос улсад хийдэг. Хариу хэдий хугацаанд гардаг вэ?
-Лабораторийн ачааллаас хамаарч янз бүр байдаг. Ер нь бол 21 хоногоос сар болж байж гардаг.
-Допинг хэрэглэсэн таван бөхийг танайхаас олон нийтэд зарласан. Ер нь олон нийтэд зарлах нь хэр зөв байдаг вэ. Хүний нэр төрд халдлаа гэх асуудал яригдахгүй юу?
-Допинг илэрсэн тохиолдол зарлах тодорхой хэмжээний хугацаа гэж байдаг. Шинжилгээ аваад А сорьцын хариу ирээд сөрөг гарсан байхад бид зарладаггүй.Тухайн тамирчны харьяалагдах холбоонд хэлээд В сорьцоо хийлгэх үү яах уу гэдгийг асуудаг. Харин А сорьцыг хүлээн зөвшөөрсөн тохиолдолд зарлана. Мөн зарлах хугацаан болсон байвал бид зарлаж болдог юм
